მსჯავრდებული მესამე პრეზიდენტი, დღეს, შუშის ბარიერის მიღმა, ისევ, ირწმუნებოდა რომ უდანაშაულოა. ე.წ. პიჯაკების საქმის განხილვა, სადაც ბრალდების მხარე ექსპრეზიდენტს საბიუჯეტო თანხის - გაფლანგვას ედავება - ხმაურის ფონზე მიმდინარეობდა. მიხეილ სააკაშვილმა პროკურორები და მოსამართლეები კორუფციასა და თანხის გაფლანგვაში დაადანაშაულა. მსჯავრდებულის ვრცელმა სიტყვამ პროკურორების გაღიზიანება გამოიწვია.
საქართველოს მესამე პრეზიდენტმა სასამართლო პროცესზე განმარტა,
რომ თანხის მეხუთედი, რომელზეც პროკურატურა მას ედავება, სანდრა რულოვსმა გარკვეულ ქველმოქმედებას მოახმარა.
სააკაშვილმა დღეს რამდენჯერმე თქვა, რომ ქართულ მართლმსაჯულებას არ ენდობა. ექსპრეზიდენტის თქმით, სასამართლო სისტემის შეცვლის შემთხვევაში მზადაა საკუთარი უდანაშაულობა დაამტკიცოს.
საქართველოს მესამე პრეზიდენტმა გლდანის ციხეში მის მიმართ წამებისა და არაადამიანური მოპყრობის ახალი დეტალების შესახებ ისაუბრა. თქვა, რომ იგი, პირადად ბიძინა ივანიშვილისა და ვლადიმერ პუტინის წამების მსვერპლია.
საქართველოს მესამე პრეზიდენტის პროცესს, დღეს, მედიის წარმომადგენლებიც ესწრებოდნენ. სიტყვით გამოსვლა სააკაშვილმა, სწორედ, ჟურნალისტებისთვის მადლობის გადახდით დაიწყო. ექს-პრეზიდენტმა კიდევ ერთხელ გაიხსენა 7 ნოემბრის პერიოდი, როცა ტელეკომპანია ,,იმედი" სპეცრაზმმა დაარბია. მისი თქმით, ამ ამბებმა მასზე იმდენად იმოქმედა, რომ ხანგძლივი მკურნალობა დასჭირდა.
ე.წ. პიჯაკების საქმეზე პროკურატურამ სააკაშვილს ბრალი 2014 წელს წარუდგინა. საქმის განხილვა საქალაქო სასამართლოში 27 დეკემბერს განახლდება.