საქართველოს რეგიონებსა და დედაქალაქს შორის უთანაბრობა ძალიან მაღალია. თბილისი ქვეყნის მთლიანი ეკონომიკის 50%-ს ქმნის. შესაბამისი ანგარიში საქსტატმა 24 დეკემბერს გამოაქვეყნა. მეორე ყველაზე მსხვილი რეგიონი აჭარაა, რომელიც საქართველოს მტლიანი შიდა პროდუქტის მხოლოდ 9%-ს აგენერირებს. ბოლო ადგილზე რაჭა-ლეჩხუმი ქვემო სვანეთია, სადაც მშპ-ს მხოლოდ 0.6% იწარმოება. მუნიციპალიტეტების უმრავლესობას არ აქვს საკმარისი ქონება და რესურსები, რაც მათ საჭიროებებს გასწვდებოდა. ამიტომ თვითმმართველობები ძირითადად ცენტრალური ხელისუფლების მიერ გამოყოფილ ტრანსფერებზე არიან დამოკიდებული. თვითმმართველობების გაძლიერება ირაკლი ღარიბაშვილის ერთ-ერთი მთავარი აქცენტი იყო ჯერ კიდევ რამდენიმე წლის წინ, როცა ის პრემიერის პოსტს პირველად იკავებდა. 2014 წელს ახალი კანონიც მიიღეს, ადგილობრივი თვითმმართველობების კოდექსი. მნიშვნელოვანი სიახლე იყო ის, რომ საქართველოს ყველა მუნიციპალიტეტში მოსახლეობამ პირდაპირ აირჩია როგორც საკრებულო ასევე გამგებელი და მერი. მაშინ ითქვა, რომ საჭირო იყო თვითმმართველობების ფინანსური გაძლიერება. განკარგულებით განსაზღვრა, რომ საშემოსავლო გადასახადი წილობრივად გაიყოფოდა ცენტრალურ და ადგილობრივ ბიუჯეტებს შორის და დიდი ნაწილი მუნიციპალიტეტებს ერგებოდათ. თუმცა, ეს ასე არ მოხდა. დღეს მუნიციპალიტეტების ძირითადი შემოსავალი ქონების გადასახადი და ადგილობრივი მოსაკრებლებია - სათამაშო ბიზნესიდან, მშენებლობის ნებართვებიდან და ა.შ.

სტუმარი: ირაკლი მელაშვილი - თვითმმართველობის საკითხების სპეციალისტი

#ახალიამბები #BusinessMediaGeorgia