#ახალიამბები
დიდი ოდენობით თანხის თაღლითურად დაუფლების ფაქტზე ერთი პირის მიმართ სისხლის სამართლებრივი დევნა დაიწყო. დანაშაულებრივი ჯგუფის წევრებმა „ფეისბუქზე“ ყალბი გვერდი შექმნეს და პოტენციური დაზარალებულების მოტყუების მიზნით, თითქოსდა ევროპაში აკრედიტებული საბანკო დაწესებულების მიერ 1 000 000 ევრომდე ოდენობით შეღავათიანი კრედიტის გაცემასთან დაკავშირებით ინფორმაცია განათავსეს. შეღავათიანი სესხის მიღებით დაინტერესებული საქართველოს მოქალაქეები, გამოგონილი მიზნებისთვის, დამნაშავეებთან დაკავშირებული პირების საბანკო ანგარიშებზე რიცხავდნენ თანხებს. დანაშაულებრივი ჯგუფის წევრების, ასევე ანალოგიური საქმიანობით დაკავებული სხვა პირების გამოვლენის და მხილების მიზნით გამოძიება გრძელდება. დანაშაული სასჯელის სახით ექვსიდან ცხრა წლამდე თავისუფლების აღკვეთას ითვალისწინებს.