#ახალიამბები
გუშინდელ მასშტაბურ აქციას გამოხმაურება მოჰყვა საერთაშორისო მედიაში. ფრანს პრესის ინფორმაციით, მას შენდეგ, რაც ევროპულმა კომისიამ ქვეყნისთვის კანდიდატის სტატუსის მინიჭების გადადების რეკომენდაცია გასცა, ევროკავშირში გაწევრების მხარდასაჭერად ქუჩებში ათიათასობით ქართველი გამოვიდა. როგორც გამოცემა წერს „საქართველოს, უკრაინისა და ევროკავშირის დროშებით, პარლამენტის წინ, დაახლოებით 60 ათასი დემონსტრანტი შეიკრიბა“. ფრანს პრესის შეფასებით, საქართველოს ევროკავშირსა და ნატოში გაწევრების მცდელობა, რომელიც ქვეყნის კონსტიტუციითაა გათვალისწინებული, დიდი ხანია აღიზიანებს კრემლს და დაძაბულობამ კულმინაციას 2008 წელს მიაღწია, როდესაც რუსეთი საქართველოში შეიჭრა. “ევრონიუსი“ კი იუწყება, რომ თბილისში გამართული აქციის მიზანი ბრიუსელისთვის სიგნალის გაგზავნა იყო იმ ფონზე, როცა ევროკავშირის ლიდერებმა, ამ კვირაში უნდა განიხილონ, მიენიჭოს თუ არა კანდიდატის სტატუსი საქართველოს, უკრაინასა და მოლდოვას.