#ახალიამბები
აჭარის მუნიციპალიტეტების თანამდებობის პირთა ქონებრივ დეკლარაციებში ხარვეზებია. ამის შესახებ ვრცელ კვლევას „საერთაშორისო გამჭვირვალობა-საქართველო“ აქვეყნებს. არასამთავრობო ორგანიზაციის ცნობით, რეგიონის ექვს მუნიციპალიტეტში საჯარო მოხელეების მიერ შევსებული დეკლარაციების 20 პროცენტში ხარვეზებია. საკვლევი პერიოდი 2021-2022 წლებს მოიცავს. დასკვნის თანახმად, 178 მაღალჩინოსნიდან 36-მა დოკუმენტი ხარვეზებით შეავსო; 22-მა არ მიუთითა მისი ან მისი ოჯახის წევრის საკუთრებაში არსებული უძრავი ქონება; 16-ს საერთოდ არ აქვს დეკლარირებული მისი ან/და მისი ოჯახის წევრის მონაწილეობა სამეწარმეო საქმიანობაში - წილების ფლობა და ხელმძღვანელობა. 9 საჯარო მოხელეს არ გადაუცია წილის მართვის უფლება სხვა პირისათვის. 12-მა დეკლარაციაში არ მიუთითებია თანამდებობაზე ყოფნის პერიოდში მიღებული შრომის ანაზღაურება, ხოლო 5-მა თანამდებობაზე ყოფნისას მიიღო შემოსავლები აკრძალული საქმიანობიდან. ქონებრივი დეკლარაციის შევსების წესის დამრღვევ პირებს შორის არიან: ქობულეთის საკრებულოს თავმჯდომარე, დავით მჭედლიშვილი, ხელვაჩაურის მერი, ზაზა დიასამიძე და შუახევის მერი - ომარ ტაკიძე.