#ახალიამბები
ბათუმში, ბაგრატიონის ქუჩაზე მიმდინარე სარეაბილიტაციო სამუშაოებზე ოპოზიციას კითხვები აქვს. ბათუმის საკრებულოს წევრები „ნაციონალური მოძრაობიდან“ აცხადებენ, რომ სახელმწიფო ბიუჯეტიდან, სამუშაოებისთვის ხელშეკრულებით გათვალისწინებულ თანხებზე, 300 ათასი ლარით მეტი იხარჯება. ისინი კითხვებით მერიის კეთილმოწყობისა და ინფრასტრუქტურის სამმართველოს მიმართავენ. ხელისუფლების ოპონენტები კორუფციაზე საუბრობენ. შეგახსენებთ, ამ მისამართზე ინფრასტრუქტურული სამუშაოები გასულ წელს დაიწყო, თუმცა მალევე შეჩერდა. მერიის ინფორმაციით, მიზეზი კომპანია „ზიმო 7“-თან შეწყვეტილი ხელშეკრულება გახდა, რომელმაც ნაკისრი ვალდებულებები ვერ შეასრულა. შემდგომ გამოცხადდა ახალი ტენდერი და ხელშეკრულებაც სხვა კომპანიასთან გაფორმდა. საკითხზე საპასუხო კომენტარი ბრალდებების ადრესატ უწყებაში არ გაუკეთებიათ.