#ახალიამბები
რამდენად სამართლიანად დააჯარიმა მუნიციპალურმა ინსპექციამ გულიკო აბულაძე, ბათუმის საქალაქო სასამართლო ამ წუთებში მსჯელობს. სიმართლე, მხარეთა მოსმენის და მტკიცებულებების საფუძველზე, მოსამართლე ალექსანდრე გოგუაძემ უნდა დაადგინოს. აბულაძეს, სამართალდარღვევათა ოქმი, მეუღლის ავთანდილ ბოლქვაძის საკუთრებაში არსებულ საცხოვრებელზე ექსპრეზიდენტის, მიხეილ სააკაშვილის ბანერის გამოკვრისთვის გამოუწერეს. ოქმში წერია, რომ სარეკლამო ბანერი უნებართვოდაა გაკრული, რითაც დარღვეულია ადმინისტრაციულ სამართალდარღვევათა კოდექსის 150-ე მეოთხე პრიმა მუხლის მეორე ნაწილი. აბულაძის მტკიცებით, აღნიშნული მუხლი, შესაბამის კანონში არ არსებობს და პირველ სასამართლო პროცესზე ოქმი, კანცელარიაში სახელდახელოდ ჩარედაქტირდა. გარდა ამისა, ავთანდილ ბოლქვაძე აცხადებს, რომ კონკრეტული ბანერის საკუთრებაზე გამოკვრა ნებართვას არ საჭიროებს, რადგან იგი სარეკლამო არაა. აბულაძე ფიქრობს, რომ მას პოლიტიკური შეხედულებისათვის უპირისპირდებიან.