იცხოვრე ვარდისფრად - ასე ეწოდება კამპანიას, რომლითაც კავკასიის მედიცინის ცენტრი მსოფლიო ტენდენციას კიდევ ერთხელ შეუერთდა და ძუძუს კიბოს შესახებ ცნობიერების ამაღლების მიზნით ოქტომბრის თვის საფინალო ღონისძიება გამართა. კამპანიის ფარგლებში, 27 ოქტომბერს მედიცინის ცენტრში ძუძუს კიბოს სიმპტომების, მათი ამოცნობის, პრევენციული ღონისძიებების მნიშვნელობისა და სკრინინგის უფასო პროგრამის შესახებ ლექცია-სემინარი გაიმართა. სემინარზე ყურადღება ადრეული დიაგნოსტიკის, მის შედეგად გამოჯანმრთელების მაღალი მაჩვენებლისა და სტატისტიკის საკითხებზე გამახვილდა. „ევექსი ჰოსპიტლების“, „ევექსი კლინიკების“, „საქართველოს ჯანდაცვის ჯგუფისა“ და „მეგალაბის“ თანამშრომელ ქალებს საკუთარი ისტორიები იმ ადამიანებმაც გაუზიარეს, რომლებმაც ძუძუს კიბო უკვე დაამარცხეს. სპეციალურად ამ კამპანიისთვის, კავკასიის მედიცინის ცენტრი ვარდისფრად განათდა, რითაც კიდევ ერთხელ გაჟღერდა მოწოდება ქალების მიმართ, ისარგებლონ სკრინინგის პროგრამით, მიიღონ შესაბამისი ზომები და პერიოდულად ჩაიტარონ პრევენციული ღონისძიებები. აღსანიშნავია ისიც, რომ ცენტრი გახსნის დღიდან აქტიურადაა ჩართული ძუძუს კიბოს სკრინინგის სახელმწიფო პროგრამაში და პაციენტებს დაავადების პრევენციისა თუ მისი მკურნალობის კომპლექსურ გზას სთავაზობს.


#ახალიამბები #BusinessMediaGeorgia