#ახალიამბები
საჯარო სექტორში დასაქმებულთა დიდი რაოდენობა და მუდმივად მზარდი სოციალური ხარჯები - ეს საკითხები ინფორმაციის თავისუფლების განვითარების ინსტიტუტმა სახელმწიფო ბიუჯეტის პროექტის შესახებ კვლევის შედეგად მთავარ გამოწვევებად დაასახელა. IDFI-ის ცნობით, მოსახლეობის 9.5% საჯარო სექტორშია დასაქმებული, რაც დასაქმებულთა 65%-ზე მეტს შეადგენს. შესაბამისად, მოსახლეობის ეს ნაწილი ანაზღაურებას საქართველოს ბიუჯეტიდან იღებს, რაც ჯამში 3.3 მილიარდ ლარს შეადგენს. არასამთავრობო ორგანიზაციის რეკომენდაციაა, რომ საჯარო მოხელეთა რაოდენობა და ადმინისტრაციული ხარჯები შემცირდეს. ასევე გამოწვევაა საპენსიო და სოციალური პროგრამები, რომლის ბენეფიციარების რიცხვი და ბიუჯეტიდან გამოყოფილი ფინანსები ყოველ წელს იზრდება. ანალიტიკოსები აცხადებენ, რომ საჭიროა ბიუჯეტის სწორი გადანაწილება, რადგან ადმინისტრაციის ზომა და მზარდი სოციალური ხარჯები, სავარაუდოდ, ქვეყნის ეკონომიკურ განვითარებას შეაფერხებს.