#ახალიამბები
საქართველოს რუსეთზე ეკონომიკური დამოკიდებულება იზრდება. ამის შესახებ „საერთაშორისო გამჭვირვალობა - საქართველოს“ რუსეთ-უკრაინის ომის გავლენასა და რუსეთზე საქართველოს ეკონომიკური დამოკიდებულების შესახებ ანგარიშშია ნათქვამი. ორგანიზაციის დაკვირვებით ეს გარემოება, ფულადი გზავნილების ნახტომისებური მატებითაა განპირობებული. ანგარიშის თანახმად, მიუხედავად იმისა, რომ 2022 წელს საქართველოს რუსეთზე ეკონომიკური დამოკიდებულება მნიშვნელოვნად გაიზარდა, მას იმ დონისთვის არ მიუღწევია, რომ ამ ქვეყანასთან ეკონომიკური ურთიერთობების სრულად შეწყვეტის პირობებშიც კი საქართველო ღრმა კრიზისში აღმოჩნდეს და განვითარება ვერ შეძლოს. შესაბამისად, ორგანიზაცია მთავრობისადმი რეკომენდაციებს გასცემს, სადაც აღნიშნულია, რომ საქართველოს ხელისუფლების მიზანი რუსეთზე ეკონომიკური დამოკიდებულების მინიმუმამდე შემცირება უნდა იყოს. „საერთაშორისო გამჭვირვალობა - საქართველოს“ ინფორმაციით, საქართველოს მთლიან იმპორტში რუსეთიდან შემოსული პროდუქციის წილი 10.2%-დან 13.1%-მდე გაიზარდა, რაც ბოლო 16 წლის მაქსიმალური მაჩვენებელია.