ევროპის საბჭოში დემოკრატიის მსოფლიო ფორუმს დავესწარი – დიდი მადლობა თბილისის პოლიტიკური სწავლების სკოლას ამ შესაძლებლობისთვის და არა – მარტო.

წელს ფორუმს ასეთი სახელწოდება ჰქონდა – დემოკრატია: ახალი იმედი? ძალიან ბევრ განხილვაში მივიღე მონაწილეობა, თუმცა, ჩემი ამ ვიზიტიდან მხოლოდ ორი ამონარიდი მინდა შემოგთავაზოთ. პირველი – გამხსნელ სესიაზე ნათქვამი სიტყვაა. არ დაგიმალავთ, განსაკუთრებული მღელვარება ახლდა სიტყვით გამოსვლას იქ, სადაც პირველად გაისმა სიტყვები – მე ვარ ქართველი და მაშასადამე, მე ვარ ევროპელი! და დღესაც ამ გზისთვის ვიბრძვით ისინი, ვისაც უკანმოუხედავად გვჯერა საქართველოს ევროპული მომავლის, დემოკრატიის და იმ ღირებულებების, რაზეც გადის საქართველოს კეთილდღეობით აღსავსე ახალი იმედი და ისტორია.

და მეორე აქცენტი, რასაც მინდა თქვენი ყურადღება მივაპყრო – ეს კორუფციასთან დაკავშირებული თემებია. კორუფციის წინააღმდეგ თანმიმდევრული ბრძოლა და სახელმწიფოს მზარდი ანგარიშვალდებულება თავისი მოქალაქეების მიმართ ფორუმზე განხილული იყო, როგორც დემოკრატიის მიმართ რწმენის შენარჩუნების მთავარი წინაპირობა. მე ამ ძალიან საინტერესო გლობალურ დისკუსიაში წინა პლანზე საქართველო წამოვწიე და ძალიან საინტერესო გამოხმაურებაც მივიღე.

რამდენიმე დაკვირვება, რომელიც აქვე მინდა გაგიზიაროთ ის არის, რომ ევროპის საბჭო ჯერ კიდევ ფხიზლდება – მის დღის წესრიგში მოსახვედრად მუდმივი კომუნიკაციაა საჭირო; საკუთარი პრობლემების მკაფიოდ და მიუკერძოებლად იდენტიფიცირებაა საჭირო; აქტიურობა და კონკრეტული ნაბიჯების გადადგმაა საჭირო – მოკლედ რომ ვთქვათ, საჭიროა მუშაობა; მუშაობა იმისთვის, რომ რაც ჩვენ გვაწუხებს, ის უფრო ნათლად დაინახოს ევროპამ – სადაც, ისტორიისთვის გადამწყვეტ ამ მომენტშიც კი, იგივე პრობლემები არ აქვთ, რაც ჩვენ.




#ახალიამბები #BusinessMediaGeorgia