#ახალიამბები
მიხეილ სააკაშვილის პროცესის პარალელურად, თბილისის საქალაქო სასამართლოს ეზოში ექსპრეზიდენტის მხარდამჭერები იყვნენ შეკრებილები. ისინი პროცესების დაჩქარებას ითხოვდნენ და ამბობდნენ, რომ სააკაშვილის სიცოცხლისა და ჯანმრთელობისთვის ყველა დღე მნიშვნელოვანია. თანაპარტიელების შეფასებით, ექსპრეზიდენტის სახე ახლა ყველაზე მეტყველი საბუთია იმისა, რომ ხელისუფლებამ დანაშაული ჩაიდინა და მას ამიტომაც „მალავენ“. შეკრებილების თქმით, „ოცნების“ პოლიტიკა ავტორიტარული და დიქტატორული რეჟიმებისათვისაა დამახასიათებელი, სადაც ადამიანის უფლებებს ფასი არ აქვს. სხდომის დასრულების შემდეგ, სასამართლოსთან ადგილი ჰქონდა ფიზიკურ დაპირისპირებასა და შეხლა-შემოხლას. შეკრებილები პენიტენციური სამსახურის წარმომადგენელს გადაადგილების საშუალებას არ აძლევდნენ. აქციის მონაწილეები სკანდირებდნენ: „მონებო“, „მკვლელებო“ და „არაკაცებო“.