ევროპული გაზის ბაზარზე სერიოზული აქტორი ვხდებით - ეს იყო აზერბაიჯანის პრეზიდენტის ილჰამ ალიევის ერთ-ერთი მთავარი გზავნილი ამ კვირაში ადგილობრივ მედიასთან შეხვედრისას. ალიევი ამბობს, რომ ენერგეტიკული უსაფრთხოება გლობალური გამოწვევა გახდა, ხოლო ევროპის დღის წესრიგში ყველაზე მნიშვნელოვან საკითხად იქცა. ამ ფონზე აზერბაიჯანი მზადაა ევროპას ბუნებრივი გაზი გაზრდილი მოცულობით მიაწოდოს აზერბაიჯანის პრეზიდენტმა მედიასთან ისიც თქვა, რომ უკვე არის ფიქრი გაზსადენების TANAP–ისა და TAP-ის გამტარუნარიანობის გაორმაგებაზე.

აზერბაიჯანი ევროპისთვის უკვე ზრდის გაზის მიწოდებას, 2021 წელს ევროპულმა ქვეყნებმა 8.1 მილიარდი კუბური მეტრი აზერბაიჯანული გაზი მიიღეს, 2022 წელს კი, 12 მილიარდ კუბურ მეტრის მიწოდება მოიაზრებოდა. 2023 წლიდან მცირე მოცულობით, თუმცა, მაინც დაიწყო გაზის მიწოდება რუმინეთისთვის, რომლის ტრანსპორტირება სამხრეთის გაზის დერეფნისა და საბერძნეთი - ბულგარეთის ინტერ-კონექტორით მოხდება.

სამხრეთის გაზის დერეფნის დატვირთვით რა თქმა უნდა სარგებელი აქვს საქართველოსაც, რომელიც გაზის ტრანზიტის სანაცვლოდ ოფციურ გაზს იღებს. 2023 წლის პროგნოზით, წელს ოფციური/დამატებითი გაზის მოცულობა 1.4 მილიარდ კუბურ მეტრამდე გაიზრდება.

ევროკავშირთან გაფორმებული შეთანხმებით კი, აზერბაიჯანი მზადაა 2027 წლისთვის ევროკავშირისთვის წლიური მიწოდება 20 მილიარდი კუბური მეტრამდე გაზარდოს. თუმცა როგორც ალიევი ამბობს, ქვეყანას მეტი ამბიციაც აქვს.

სტუმარი: არჩილ მამათელაშვილი - ენერგეტიკოსი;
#ახალიამბები #BusinessMediaGeorgia