საქართველოს პარლამენტის საბიუჯეტო-საფინანსო კომიტეტის სხდომაზე “საქართველოს ეროვნული ბანკის შესახებ” საქართველოს ორგანულ კანონში შესატანი ცვლილებები განიხილეს. ცვლილებების თავდაპირველი ვარიანტი, რომელიც საქართველოს პარლამენტის წევრებმა წარმოადგინეს, საქართველოს ეროვნული ბანკის მმართველობით სტრუქტურაში არსებული ბუნდოვანი დეტალის შეცვლას ითვალისწინებდა. ეროვნული ბანკის საბჭოს პირველი ვიცეპრეზიდენტის თანამდებობა ემატება, რომელიც ეროვნული ბანკის პრეზიდენტის არყოფნის შემთხვევაში მის მოვალეობას შეასრულებს. ცვლილებით, პირველ ვიცე-პრეზიდენტს ეროვნული ბანკის პრეზიდენტის წარდგინებით, თანამდებობაზე დანიშნავს და გაათავისუფლებს ეროვნული ბანკის საბჭო. კანონპროექტის პირველი ვერსიის თანახმად, ეროვნული ბანკს, ჯამში, ოთხი ვიცე-პრეზიდენტი უნდა ჰყოლოდა. კანონპროექტის აღნიშნულ ვერსიაზე შენიშვნები აქვს საქართველოს ეროვნულ ბანკს. სებ-ში განმარტავენ რომ, თუ ეროვნულ ბანკს ხუთი აღმასრულებელი წევრი ეყოლება, ანუ პრეზიდენტი და ოთხი ვიცე-პრეზიდენტი, როგორც ეს კანონპროექტის პირველი რედაქციით არის გათვალისწინებული, ეროვნული ბანკის საბჭოს, როგორც დამოუკიდებელი ზედამხედველი ორგანოს როლი გაუქმდება. ანალოგიური პოზიცია აქვს “საერთაშორისო სავალუტო ფონდსაც”.

#ახალიამბები #BusinessMediaGeorgia