#ახალიამბები
ჯუმბერ ვარდმანიძის პოლიტიკური მემკვიდრე წინამორბედის პრაქტიკას იზიარებს. ზაზა დიასამიძე უკანონო მშენებლობას საკუთარ ნაკვეთზე აწარმოებს. კანონდარღვევა „საერთაშორისო გამჭვირვალობა საქართველომ გამოავლინა“. ორგანიზაციამ აჭარაში, თანამდებობის პირთა მიერ მიმდინარე და დასრულებული მშენებლობების კანონიერება შეისწავლა. შედეგად დაადგინა, რომ ხელვაჩაურის მერმა ნებართვის გარეშე მშენებლობა მეუღლის კუთვნილ ნაკვეთზე დაიწყო. ასევე უკანონოდ აწარმოა მშენებლობა ქედაში, აჭარის ჯანდაცვის მინისტრის მოადგილემ. ედუარდ ნაკაშიძემ სოფელ არსენაულში, საცხოვრებელი სახლის მშენებლობა 2018 წელს დაიწყო. როგორც, „საერთაშორისო გამჭვირვალობა - საქართველოში” ამბობენ, ნაკაშიძესთან დაკავშირებული საჯარო ინფორმაცია ორგანიზაციამ სასამართლოს გზით მოიპოვა, რადგან მერიამ იგი თვეების განამვლობაში არ მიაწოდა. სასამართლოს მიმართა ორგანიზაციამ, ქობულეთის საკრებულოს თავმჯდომარის, დავით მჭედლიშვილის შემთხვევაშიც. მესამე სექტორს აინტერესებს, გატარდა თუ არა მის მიმართ რაიმე სანქცია, უკანონოდ წარმოებული სამშენებლო სამუშაოებისთვის. კვლევის შედეგად გამოვლინდა, რომ მშენებლობის დასრულების შემდეგ აქვს აღებული სამშენებლო ნებართვა აჭარის მთავრობის აპარატის შესყიდვების განყოფილების უფროსის, ლაშა ბოლქვაძის მამას, ტარიელ ბოლქვაძეს.