#ახალიამბები
ბათუმში, ფრიდონ ხალვაშის ქუჩის რეაბილიტაციის დასრულება, კვლავ, გადავადდა. შუალედური მიღება-ჩაბარების აქტით, ამ ეტაპზე, სამუშაოების, მხოლოდ, 44%-ია შესრულებული, არადა, პროექტი, იანვარში უნდა ჩაბარებულიყო. შიდასახელმწიფოებრივი მნიშვნელობის გზის ამ მონაკვეთის რებილიტაციას, ტენდერში 19 მილიონ 400 ათას ლარად გამარჯვებული შპს "ერ ტე დე" ახორციელებს. ეს კომპანია, საქართველოს საავტომობილო გზების დეპარტამენტის მიერ გამოცხადებული ელექტრონული ტენდერის ერთადერთი მონაწილე იყო. გაჭიანურებულ ინფრასტრუქტურულ სამუშაოებს „ნაციონალური მოძრაობა“ გამოეხმაურა. რეზო ხარაზის განცხადებით, ვიდრე „ქართული ოცნება“ ტენდერებს, პარტიის შემომწირველ კომპანიებს არგებს, რეალობა არ შეიცვლება. მისი თქმით, შპს "ერ ტე დე"-ს ხელმძღვანელი, ლუხუმ ქართლოსშვილი, „ქართული ოცნების“ შემომწირველია. საავტომობილო გზების დეპარტამენტსა და კომპანიას შორის ხელშეკრულება, 2022 წლის 13 ივნისს გაფორმდა. პასუხისმგებელ უწყებაში ჩვენს სატელეფონო ზარებს ამ დრომდე არ პასუხობენ.