#ახალიამბები
"ქართული ოცნების" ყოფილი მაღალჩინოსანი, რომელიც ცოლზე ძალადობის ბრალდებით იყო დაკავებული, გაათავისუფლეს. საუბარია არჩილ ბარამიძეზე, რომელიც ბათუმის სპორტული ცენტრის დირექტორის პოზიციას იკავებდა. როგორც TV25-ს ბრალდებულის ადვოკატმა განუცხადა, ბარამიძეს 6 თვიანი წინასწარი პატიმრობა ჰქონდა შეფარდებული, რაც ამოიწურა. შეგახსენებთ, ბარამიძე პოლიციამ გასული წლის სექტემბერში დააკავა. საგამოძიებო ორგანოს თანამშრომლებმა მას ბრალდება სისხლის სამართლის კოდექსის 126-ე პრიმა მუხლით წარუდგინეს, რაც ოჯახის წევრის მიმართ ძალადობას გულისხმობს. ბარამიძე 2019 წლის 7 აგვისტოდან 2022 წლის 25 იანვრამდე ხელვაჩაურის მერიაში მუშაობდა. იგი მუნიციპალიტეტის მერის მოადგილე იყო. მანამდე ბარამიძე ხელვაჩაურში, "ქართული ოცნების" აღმასრულებელი მდივანი იყო.