#ახალიამბები
7-9 მარტის აქციებისას დაზარალებული ზაზა ბიღიაშვილის ჯანმრთელობის მდგომარეობა მძიმეა. მკვეთრადაა შეზღუდული მისი შრომისუნარიანობა. ორგანიზაციამ „სამართლიანი არჩევნებისა და დემოკრატიის საერთაშორისო საზოგადოება“ დამოუკიდებელ ექსპერტიზას მიმართა, რომლის დასკვნაც რამდენიმე დღეში იქნება. ნინო დოლიძის განცხადებით ბიღიაშვილი 7 მარტს, აქციაზე ჯანმრთელი მივიდა. დარბევის შედეგად კი, მან მარჯვენა თვალიდან მხედველობა დაკარგა. დოლიძის თქმით, პირველადი შეფასებით, დაზიანების ხარისხი მძიმეა. იგი სახელმწიფოს მხრიდან ბრალეულობაზე საუბრობს და ამბობს, რომ ამ დრომდე, თანამდებობების პირები და შესაბამისი უწყებები დაზარალებულის მდგომარეობით არ დაინტერესებულან. რაც შეეხება დაზარალებულს, ზაზა ბიღიაშვილმა აქციაზე მომხდარ იმ შემთხვევაზე საუბრისას, როცა თვალი დაუზიანდა, აღნიშნა, რომ კაფსულა, რომელიც თვალში მოხვდა, სპეცრაზმიდან ისროლეს.