2023 წლის იანვარ-მარტში საქართველოში საქონლით საგარეო სავაჭრო ბრუნვა 4 მილიარდ 784 მილიონი ამერიკული დოლარი იყო, რაც შარშან იგივე პერიოდთან შედარებით 22.1 პროცენტით მეტია. აქედან ექსპორტი 1 მილიარდ 462 მილიონი დოლარია. ზრდა 24.7 პროცენტია. იმპორტი – 3 მილიარდ 322 მილიონი დოლარია; ზრდა 21 პროცენტია.

2023 წლის იანვარ-მარტში ათი უმსხვილესი საექსპორტო პარტნიორი ქვეყნის წილი საქართველოს მთლიან ექსპორტში 80.9 პროცენტი იყო. უმსხვილესი საექსპორტო სამეული შემდეგნაირად ჩამოყალიბდა: სომხეთი, აზერბაიჯანი და რუსეთი.

2023 წლის იანვარ-მარტში ექსპორტზე ყველაზე დიდი რაოდენობით მსუბუქი ავტომობილები გავიდა – მთელი ექსპორტის 28.2 პროცენტი. მეორე ადგილზეა სპილენძის მადნები და კონცენტრატები, ხოლო მესამე ადგილზეა ფეროშენადნობები.

რაც შეეხება იმპორტს, იგივე პერიოდში ათი უმსხვილესი საიმპორტო პარტნიორი ქვეყნის წილი საქართველოს მთლიან იმპორტში 69.4 პროცენტია. პირველ სამეულში შედის: თურქეთი, რუსეთი და ამერიკის შეერთებული შტატები.

რაც შეეხება ავტომობილების რეექსპორტს, პირველ კვარტალში საქართველოდან უცხოეთში რეკორდული მოცულობის 412 მილიონი დოლარის ღირებულების 22 ათას 400–ი ავტომობილი გავიდა ექსპორტზე. ეს მოცულობა წინა წელთან შედარებით 333%-ით მეტი იყო. რეექსპორტზე გასული მანქანების უდიდესი ნაწილი მეორადია, ხოლო ერთეულის საშუალო ფასი $18 ათასი იყო. ქვეყნების მიხედვით რეექსპორტში პირველ ადგილზე აზერბაიჯანია, სადაც 99 მილიონ 700 ათასი დოლარის ღირებულების 7 ათას 300–ი მსუბუქი ავტომობილი გავიდა რეექსპორტზე. მეორე ადგილზეა სომხეთი, მესამეზე კი – ყაზახეთი. ტოპ ხუთეულში შედის რუსეთიც.

სტუმარი: გოგიტა თოდრაძე - საქსტატის აღმასრულებელი დირექტორი;



#ახალიამბები #BusinessMediaGeorgia