პარლამენტმა „საპარტნიორო ფონდის რეფორმირების შესახებ“ ეკონომიკის სამინისტროს მიერ მომზადებული კანონპროექტის განხილვა დაიწყო. ორგანიზაციას სახელი ეცვლება და მას “საქართველოს განვითარების ფონდი” ეწოდება. როგორც ცნობილია, 2017 წლიდან საერთაშორისო სავალუტო ფონდის მოთხოვნით, საპარტნიორო ფონდს რეფორმირებამდე ახალი პროექტების დაფინანსება აეკრძალა და რამდენიმე წელია, ამ მხრივ ის, ფაქტობრივად, უმოქმედო იყო. ამ დროის განმავლობაში ერთ-ერთ მთავარ კითხვას წარმოადგენდა - რა იქნებოდა რეფორმირებული ფონდის დაფინანსების წყარო. კანონპროექტში ამ მხრივ არაფერი იცვლება, საპარტნიორო ფონდის აღმასრულებელი დირექტორის მოადგილემ დაადასტურა, რომ რეფორმირებული საპარტნიორო ფონდი არც ამჯერად დაფინანსდება სახელმწიფო ბიუჯეტიდან. უცვლელად გადადის ფონდის დაფინანსების შესახებ არსებული მუხლები.

მათ შორის ფონდს შეუძლია თანხები მოიზიდოს საერთაშორისო საფინანსო ინსტიტუტებისგან, ასევე გათვალისწინებულია შესაძლებლობა, რომ ფონდში კაპიტალის შენატანი განახორციელოს მისმა “დამფუძნებელმა”, ანუ მთავრობამ. კანონპროექტის მიხედვით, ახალი ფონდი კომერციულად მდგრად პროექტებში განახორციელებს ინვესტიციებს. ფონდის წარმომადგენელი ამბობს რომ პრიორიტეტულ მიმართულებებში შედის, ინოვაციების, სტარტაპების, ექსპორტზე ორიენტირებული და იმპორტს ჩამნაცვლებელი პროექტების დაფინანსება. რეალურად რა ფუნქცია უნდა შეასრულოს რეფორმირებულმა საპარტნიორო ფონდმა, ქმნის თუ არა მთავრობა უკვე არსებული ბიზნესის მხარდამჭერი პროგრამების კონკურენტს?

სტუმარი: ბექა ლილუაშვილი - პარლამენტარი;

#ახალიამბები #BusinessMediaGeorgia