ფინანსთა მინისტრის მოადგილის გიორგი კაკაურიძის თქმით, რეფორმის კანონპროექტს უწყება, სავარაუდოდ, საგაზაფხულო სესიაზე გაიტანს, ამ ეტაპისთვის კი მიმდინარეობს რეფორმის ზეგავლენის შეფასება, რასაც მუნიციპალიტეტებთან კონსულტაციები მოჰყვება. გიორგი კაკაურიძის განმარტებით, ახალი რეფორმის მიხედვით ქონების გადასახადი დამოკიდებული იქნება იმ ფართზე, რომელიც კომპანიებს თუ ფიზიკურ პირებს ექნებათ. მეტი დეტალი ამ ეტაპზე ჩვენთვის უცნობია.

სექტემბერში საპარლამენტო ჯგუფ „ევროოპტიმისტების“ წევრი, დეპუტატი რომან გოცირიძე გამოვიდა ქონების გადასახადის წესში ცვლილებების შეტანის ინიციატივით. მისი მოსაზრებით, დღეს მოქმედი წესი მოძველებულია და რეალობასთან შეუსაბამოა – ინფლაციის, ლარის გაუფასურებისა და შემოსავლების ოდენობის ცვლილებების გამო.

მოქმედი კანონით ქონების გადასახადი უნდა გადაიხადოს ოჯახმა, რომლის წევრების ჯამური შემოსავალიც აჭარბებს 40 000 ლარს და ფლობს უძრავ ქონებას. ქონების გადასახადისგან თავისუფლდებიან მხოლოდ ის ოჯახები, რომელთა შემოსავალიც 40-ათას ლარზე ნაკლებია.

რომან გოცირიძე მაშინ ამბობდა, რომ 40 000-ლარიანი ზღვარი 2004 წელს დაწესდა მაშინ, როცა შემოსავლები დღევანდელთან შედარებით უფრო დაბალი იყო, ხოლო ახლა – 40 ათას ლარზე მეტი შემოსავალი შეიძლება იმ ოჯახებსაც ჰქონდეთ, რომლებიც ფინანსურად მდიდრები არ არიან.

რატომაა მოძველებული მოქმედი წესი და რა შეიძლება მოიტანოს რეფორმამ, რომელიც ქონების გადასახადს დაუკავშირებს ფართს, რომელიც კომპანიებს თუ ფიზიკურ პირებს ექნებათ?

სტუმარი: რომან გოცირიძე - პარლამენტარი;

#ახალიამბები #BusinessMediaGeorgia