#ახალიამბები
25-26 ნოემბერს, ბათუმი სოფლის ტურიზმის ფესტივალ „განდაგანას“ უმასპინძლებს. ორი დღის განმავლობაში, საშემოდგომო დეკორაციებით გაფორმებულ ევროპის მოედანზე მთიანი აჭარა თავისი კულტურით, კულინარიით, ტრადიციებითა და რეწვის დარგებით იქნება წარდგენილი. წელს ღონისძიების ფარგლებში მთავარი აქცენტი აჭარული სამზარეულოსა და ხალხური რეწვის დარგებზე გაკეთდება. მოეწყობა კუთხეც, სადაც რეგიონის ხუთივე მუნიციპალიტეტისთვის დამახასიათებელ კერძებს მოამზადებენ, ჩატარდება მასტერკლასები და კულინარიული შეჯიბრებები. სტუმრებს საშუალება ექნებათ მონაწილეობა მიიღონ ქორეოგრაფიულ და კულინარიულ მასტერკლასებში. სტუმრების განწყობაზე ადგილობრივ ფოლკლორულ ჯგუფებთან ერთად ანსამბლი „შვიდკაცა“, „აფხაზეთი“, ჯგუფი „გორდელა“, „ბანი“ და „მგზავრები“ იზრუნებენ. ფესტივალი „განდაგანა“ 2015 წლიდან იმართება.