ბოლო წლებში მსოფლიოში, კიდევ უფრო აქტუალური ხდება ხელოვნური ინტელექტის ცნება. სხვადასხვა კვლევების მიხედვით, ხელოვნურ ინტელექტს 2030 წლისთვის დამატებითი $10-15 ტრილიონამდე ეკონომიკური სარგებლის მოტანა შეუძლია. ბევრი ექსპერტის აზრით, მისი განვითარება შეუჩერებელი პროცესია და ის საზოგადოება, რომელიც არ იქნება მზად მიიღოს ეს ცვლილებები, მნიშვნელოვნად ჩამორჩება ციფრული ტრანსფორმაციის პროცესს.

ტექნოლოგიური განვითარების შედეგად უკვე შექმნილია ისეთი პლატფორმები, რომლებმაც ხელი შეუწყვეს ხელოვნურ ინტელექტზე დაფუძნებული სერვისების შექმნას. დღეს ხელოვნურ ინტელექტს გააჩნია ფაქტობრივად ყველა სამუშაო პროცესის უფრო ეფექტურად გარდაქმნის პოტენციალი.

მაგალითისთვის, ხელოვნური ინტელექტის გამოყენებას ფინანსურ სფეროში შეუძლია პროცესების ავტომატიზაცია, შემოსავლებისა და ბიუჯეტის პროგნოზირება, თაღლითობის იდენტიფიცირება და მისი პრევენციის გაუმჯობესება. რეალურ დროში სხვადასხვა სახის რისკების ანალიზი და მონიტორინგი, ასევე ვირტუალური ასისტენტების და ჩატბოტების სერვისის გაუმჯობესება.

ბოლო პერიოდში განსაკუთრებით აქტუალური გახდა Generative AI, რომელიც ფაქტობრივად წარმოადგენს ხელოვნური ინტელექტით გამყარებულ მანქანური სწავლების მოდელს. Generative AI-ის კარგი მაგალითია OpenAI-ის მიერ გამოშვებული ChatGPT. ამ ტიპის ხელოვნურ ინტელექტს ფუნქციების უფრო ფართო სპექტრი გააჩნია, და მას შეუძლია მუშაობა არასტრუქტურიზებულ, დიდი მოცულობის მონაცემებთან საკმაოდ სწრაფად, რაც ზრდის მის გამოყენებადობას ფინანსებში.

თუმცა აღნიშნულ დადებით მხარეებთან ერთად ხელოვნურ ინტელექტს აქვს თავისი რისკები, რომელთა დროული იდენტიფიკაცია არის საჭირო სანამ მას გამოვიყენებთ სხვადასხვა პროცესებში. სწორედ ამიტომ 2021 წელს ევროკავშირმა შეიმუშავა ხელოვნური ინტელექტის რეგულაცია, რომელშიც განსაზღვრულია ის პრინციპები და მიდგომები რაც უნდა იქნას მხედველობაში მიღებული ხელოვნური ინტელექტის გამოყენების დროს. დაახლოებით ერთ თვეში იქნება საბოლოო განხილვა ამ დოკუმენტის და მისი ძალაში შესვლა 2025 წლიდან იგეგმება.


#ახალიამბები #BusinessMediaGeorgia