გარემოსა და ბუნებრივი რესურსების დაცვის სამინისტროში „მინამატას პროექტის“ შემაჯამებელი შეხვედრა გაიმართა. შეხვედრის მონაწილეებს მინისტრის მოადგილემ ეკატერინე გრიგალავამ მიმართა.
მინამატას კონვენცია აწესებს რიგ ვალდებულებებს სხვადასხვა წარმოებიდან ვერცხლისწყლის გავრცელებაზე, ვერცხლისწყლის შემცველი პროდუქტების გამოყენებასა და წარმოებაზე, ექსპორტსა და იმპორტზე, ასევე ოქროს მცირემასშტაბიან მოპოვებაზე, რომელიც ვერცხლისწყლის გავრცელების ერთ-ერთ წყაროს წარმოადგენს.საქართველო აქტიურად მონაწილეობდა საერთაშორისო მოლაპარაკებაში კონვენციის მიღების თაობაზე. ქვეყანამ ხელი მოაწერა ვერცხლისწყლის შესახებ მინამატას კონვენციას და ამჟამად მისი რატიფიცირებისათვის ემზადება. მხარეებმა პროექტის ფარგლებში მიღწეულ შედეგებსა და სამომავლო ნაბიჯებზე იმსჯელეს.
კონვენციის სახელი უკავშირდება იაპონიის ქალაქს მინამატას, სადაც გასული საუკუნის 50-იან წლებში ადგილობრივი საწარმოს მიერ მინამატას ყურეში ვერცხლისწყლით დაბინძურებული წყლის ჩაშვების შედეგად მოიწამლა ათი ათასობით ადამიანი.
შეხვედრა გლობალური გარემოსდაცვითი ფონდისა (GEF) და საქართველოში გაეროს განვითარების პროგრამის (UNDP) ერთობლივი პროექტის “მინამატას კონვენციის რატიფიცირებისა და მისი აღსრულების მიზნით საქართველოში გადაწყვეტილების მიღების პროცესის გაძლიერება და ინსტიტუციურ შესაძლებლობათა განმტკიცება“ ფარგლებში გაიმართა.