„ტაბულას“ რედაქტორის თამარ ჩერგოლეიშვილის ინფორმაციით, „ტაბულას“ ოფისის აივანზე შაბათს, 18 ნოემბერს, 20:45 საათზე ცეცხლწაკიდებული ნივთები ჩაყარეს.„პოლიცია გამოვიძახეთ. ამოვიღეთ კამერის ჩანაწერი - მალე მექნება, ზემოდან ცვივა დამწვარი ტანსაცმელი და თუნუქის ჯამი.როგორც ჩანს თუნუქის ჯამში წაუკიდეს ცეცხლი და ჯამიანად ჩამოაგდეს.ვინც დაწვით გვემუქრებოდა, ის პატიმრობაშია - დედამისი ლოგინადაა ჩავარდნილი და როგორც გამომძიებელი ამბობს, თავისით ვერ დგება.თავდამსხმელის ოჯახი ცხოვრობს აი ამ ბინაში - გადაღებულია ტაბულას ტერასიდან, დამწვარი ტანსაცმელი და თეთრეული, ჯამიანად - ეყარა მისი მიშენების ქვეშ.

სამწუხაროდ, ოფისის დიასახლისი ვერ მიხვდა, რომ არ უნდა დაელაგებინა.

კრიმპოლი მოვიდა - ჩანაწერიდან ნათლად ჩანს, რომ გოჩა მაისურაძის ბინიდან ყრის ვიღაც ალუმინის ქვაბში დამწვარ თეთრეულს და ტანსაცმელს.

ამ ბინაში გოჩა მაისურაძის დედა ცხოვრობს. გამომძიებელი ამბობს, რომ მან ნახა დედა და ის ლოგინიდან ვერ დგება, თუმცა ჩემი თანამშრომლები ამტკიცებენ, რომ ეს ქალი არაერთხელ უნახავთ სარეცხის ფენისას აივანზე.

აქ უკვე ტაბულას უსაფრთხოება აღარაფერ შუაშია - ცეცხლმოკიდებულმა ტანსაცმელმა შეიძლება მთელი კორპუსი გადაწვას.“- წერს თამარ ჩერგოლეიშვილი.

შეგახსენებთ, პარასკევს 17 ნოემბერს „ტაბულა მედიას“ ოფისში მამაკაცი მივიდა, რომელიც ოფისის გადაწვით იმუქრებოდა. სამართალდამცველებმა გოჩა მაისურაძე იმავე დღეს ქ.თბილისში დააკავეს. სასამართლომ ბრალდებულის მიმართ აღკვეთის ღონისძიებად პატიმრობის გამოყენებას საფუძვლად დაუდო ახალი დანაშაულის ჩადენისა და მიმალვის საფრთხეების არსებობა.