"არ ვცნობთ ზურაბიშვილს, როგორც ხალხის მიერ არჩეულ პრეზიდენტს. ის დანიშნულია ივანიშვილის მიერ"- ოპოზიცია საპრეზიდენტო არჩევნების შედეგებს არ აღიარებს

"მილიონამდე ამომრჩევლის ხმას აუცილებლად გავაგებინებთ ბიძინა ივანიშვილს"- ამის შესახებ გაერთიანებული ოპოზიციის წარმომადგენელმა, "ეროვნულ დემოკრატიული პარტიის" ლიდერმა ბაჩუკი ქარდავამ, კვირას, 2 დეკემბერს დაგეგმილი აქციის შესახებ საუბრისას განაცხადა.
ბაჩუკი ქარდავა "ძალა ერთობაშიას" მსგავსად, საპრეზიდენტო არჩევნების შედეგებს არ აღიარებს და ვადამდელ საპარლამენტო არჩევნებს ითხოვს და იქვე მის პირად მოსაზრებას აჟღერებს, რომლის თანახმადაც, ვადამდელ საპარლამენტო არჩევნებთან ერთად, საპრეზიდენტო არჩევნების ხელახალი კენჭისყრა უნდა მოხდეს.

ედპ-ს ლიდერის შეფასებით, ოპოზიციის მხარდამჭერებს პროტესტის გამოხატვის უფლებას საქართველოს კონსტიტუცია აძლევს.

"მაქსიმალური პროტესტი, რომელიც კონსტიტუციით მინიჭებული აქვს საქართველოს მოქალაქეს და ჩვენ ეს ბერკეტი უნდა გამოვიყენოთ იმისთვის, რომ ქვეყანაში დავაბრუნოთ დემოკრატია და არჩევნებს ჰქონდეს აზრი. 28 ნოემბერი არ იყო არჩევნები და მეორე - ჩვენ არ ვცნობთ სალომე ზურაბიშვილს, როგორც ხალხის მიერ არჩეულ საქართველოს პრეზიდენტს. ის არის დანიშნული ბიძინა ივანიშვილის მიერ.

მე პირადად მიმაჩნია, ეს არის ჩემი სუბიექტური აზრი, რომ აუცილებლად უნდა ჩატარდეს საპრეზიდენტო არჩევნების ხელახალი კენჭისყრა, ვადამდელ საპარლამენტო არჩევნებთან ერთად. ჩვენ ამისთვის ბოლომდე ვიბრძოლებთ, ბრძოლა ახლა იწყება. და ის მილიონამდე ამომრჩეველი, რომელმაც მხარი დაუჭირა გაერთიანებულ ოპოზიციას აუცილებლად იქნება დაცული ჩემი მხრიდან და იმ მილიონამდე ამომრჩევლის ხმას აუცილებლად გავაგებინებთ ბიძინა ივანიშვილს. ეს არის დღეს ჩვენი ჩვენი ამოცანა და მინდა ყველამ იცოდეს: ბრძოლა ახლა იწყება"- განაცხადა ბაჩუკი ქარდავამ.