რკინიგზელთა ახალი პროფკავშირი ვიდეოს ავრცელეს, სადაც ასახულია სარკინიგზო ხიდზე მიმდინარე სამუშაოები. მუშები რამდენიმე ათეული მეტრის სიმაღლეზე ყოველგვარი აღჭურვილობის გარეშე მუშაობენ.
ვიდეომ დიდი ვნებათაღელვა გამოიწვია. ჯანდაცვის სამინისტროს შრომისა და დასაქმების პოლიტიკის დეპარტამენტის უფროსის ელზა ჯგერენაიას შეფასებით, გავრცელებულ კადრებში აშკარად ჩანს უსაფრთხოების ნორმების დარღვევა. საუბარია თბილისის შესასვლელში სარკინიგზო ხიდზე მიმდინარე სამუშაოებზე. დემონტაჟი რამდენიმე დღეა, დაახლოებით 70 მეტრის სიმაღლეზე მიმდინარეობს. ფაქტს უკვე გამოეხმაურა საქართველოს რკინიგზის კორპორატიული მართვის დეპარტამენტის უფროსი აკაკი საღირაშვილი. მისი თქმით, გავრცელებულ ვიდეოსთან დაკავშირებით, მოკლვევა ჩატარდება. „უსაფრთხოების ნორმების დარღვევა იყო თუ არ იყო ამას დაადგენენ. მე რაც ვნახე ვფიქრობ ამაზე რეაგირება არის საჭირო, მოკვლევა ჩატარდება და გავარკვევთ რა მოხდა იქ და რა ხდება საერთოდ, ასეთ სიმაღლეზე ხალხი რატომ მუშაობს, პირველი უსაფრთხოების ჩაფხუტები არა აქვთ, ქამრები არა აქვთ სპეციალური, უსაფრთხოების ფეხსაცმელი არა აქვთ და ა.შ. შესაბამისი დარგის სპეციალისტები რკინიგზაშივე და გერეთაც მოიკვლევენ და ამაზე რეაგირება იქნება“,- განაცხადა „რუსთავი 2-ის“ ეთერში აკაკი საღირაშვილმა.