მიმწოდებლებსა და რითეიელერებს შორის ურთიერთობების საკანონმდებლო დონეზე დარეგულირების საკითხი შესაძლოა დღის წესრიგში დაბრუნდეს. კონკურენციის და მომხმარებლის დაცვის სააგენტო FMCG ბაზარზე მონიტორინგის პროცესს აგრძელებს. სააგენტოს შესწავლის ერთ-ერთ მთავარ საგანს ის პირობები წარმოადგენს, რომლითაც დისტრიბუტორები და მიმწოდებლები პროდუქციას სავაჭრო ქსელებში ათავსებენ. სააგენტოში ადასტურებენ, რომ იკვეთება ტენდენცია, რომ წლიდან წლამდე სავაჭრო ქსელების მიერ მიმწოდებლებისთვის დაკისრებული ხარჯები მზარდია.

მონიტორინგი აჩვენებს, რომ 2024 წელს 2021 წელთან შედარებით რიგ შემთხვევაში, ისეთი გადასახადები როგორიცაა მაგალითად, მაღაზიაში შესვლის გადასახადი, ე.წ. რეტრო ბონუსი, „ქეშბექი“, გაორმაგებულია. ქსელურ მარკეტებში შესვლა რომ დისტრიბუტორებისთვის საკმაოდ დიდ ხარჯებს მოითხოვს, ამაზე კერძო სექტორში წლებია საუბრობენ. ბიზნესი იხდის, როგორც ქსელში დაშვების საფასურს, ასევე სხვადასხვა მარკეტინგულ ხარჯს, ასეთია თაროზე დაშვების საფასური, ასევე ე.წ რეტრობონუსი, ქეშბექი და სხვა. საჭიროებს თუ არა მიმწოდებლებსა და სავაჭრო ქსელებს შორის ურთიერთობები დამატებით რეგულირებას, რა ფასს იხდის ბიზნესი ქსელში დაშვებისთვის და როგორ აისახება ეს ფასი საბოლოო მომხმარებელზე?

სტუმარი: ლაშა რიჟამაძე - საქართველოს დისტრიბუტორთა ბიზნეს ასოციაციის პრეზიდენტი


#ახალიამბები #BusinessMediaGeorgia