საქართველოს ეროვნული ბანკის მონეტარული პოლიტიკის კომიტეტმა 2025 წლის 12 მარტის სხდომაზე მონეტარული პოლიტიკის განაკვეთის კვლავ უცვლელად, 8%-ზე დატოვების გადაწყვეტილება მიიღო. სებ-ის განმარტებით, იმის მიუხედავად რომ უკანასკნელ პერიოდში ინფლაციური მოლოდინები გააქტიურდა, მთლიანობაში მოსალოდნელია რომ საშუალოვადიან პერიოდში ინფლაცია მაინც სამიზნე 3%-თან ახლოს იქნება.

რაც შეეხება ეკონომიკურ ზრდას, საქართველოს ეროვნული ბანკი აღნიშნავს, რომ ქვეყნის ეკონომიკური აქტივობა მოსალოდნელზე მაღალი ტემპით იზრდება. საუბარია იანვრის ეკონომიკური ზრდის წინასწარ შეფასებაზე, რაც ქვეყანაში 11.1%-იან ზრდაზე მიუთითებს, თუმცა ამის მიუხედავად სებ-ი ელოდება, რომ მთლიანობაში საქართველოს ეკონომიკაში გაურკვევლობა კვლავ მაღალ ნიშნულზე ნარჩუნდება, ამიტომაც მათი პროგნოზი 5%-იან ზრდაზეა გათვლილი რაც 1%-ით ნაკლებია მთავრობის გათვლებზე. წელს ბიუჯეტი 6%-იან ზრდაზეა დაგეგმილი.

რაც შეეხება საერთაშორისო საფინანსო ინსტიტუტებს, თებერვალში EBRD-მა საქართველოს 2025 წლის ეკონომიკური ზრდის პროგნოზი 6%-მდე გაზარდა, ასევე 6%-ს ვარაუდობს IMF-იც.

სებ-ი მიუთითებს, რომ მიმდინარე წელს ქვეყანაში ეკონომიკურ აქტივობაზე დადებით გავლენას ბიზნესის დაკრედიტების მაღალი ზრდის მაჩვენებელი მოახდენს.

სტუმარი: ტრისტან ჯინჭარაძე - სტემსქეილის CFO

#ახალიამბები #BusinessMediaGeorgia