რიოს 2016 წლის ოლიმპიური თამაშების დასრულების შემდეგ, პირველად ისტორიაში ძაღლების ოლიმპიური თამაშები გაიმართა. შეჯიბრებას რიოს ერთ-ერთმა ძაღლების კერძო კლუბმა უმასპინძლა. წყალში ხტომაში "ოლიმპიური ჩემპიონი" 9 თვის მიმა გახდა. ორგანიზატორები იმედოვნებენ, რომ ძაღლების ოლიმპიადა ამიერიდან ყოველთვის გაიმართება. #სპორტი
საქართველოს ოლიმპიურმა დელეგაციამ რიოს თამაშებზე პირველი ოქროს მედალი მოიპოვა! ძალოსანმა ლაშა ტალახაძემ მძიმე წონაში, ჩემპიონის ტიტული მსოფლიო რეკორდით მოიგო - 215 კილოგრამი ატაცში, 258 კილოგრამი აკვრაში, 473 კილო ორჭიდის ჯამში! ამავე წონით კატეგორიაში მოასპარეზე მეორე ქართველმა სპორტსმენმა, ირაკლი თურმანიძემ ატაცში სამივე ცდა გამოიყენა და 207 კილო დააფიქსირა, რასაც აკვრაში 241 დაუმატა და საბოლოო ჯამში, 448 კილოგრამით (პირადი რეკორდი) მე-3 ადგილი დაიკავა და ბრინჯაოს მედალს დაეუფლა. #ცეცხლიაინთო #Rio2016 #Olympics
ლეგენდარული ოლიმპიელი, იამაიკელი უსაინ ბოლტი ექსტრაორდინალური საქციელით რომ გამოირჩევა, ეს ახალი არავისთვისაა. პარასკევს, გვიან ღამით, როცა რიოს ოლიმპიურ სტადიონზე ყველა შეჯიბრება დასრულებული იყო, განათება სანახევროდ ჩამქრალი და სტადიონზე მხოლოდ მომსახურე პერსონალი იმყოფებოდა, მოულოდნელად არენაზე ბოლტი გამოჩნდა. იამაიკელმა სპრინტერმა თავისი ნიჭის გამოცდა მძლეოსნობის სხვა სახეობაში სცადა. მან შუბი აიღო და გარშემომყოფთა აპლოდისმენტების თანხლებით ისროლა. როგორც თვითმხილველები წერენ, ბოლტმა შუბი 56 მეტრზე ისროლა. #ცეცხლიაინთო #Rio2016 #Olympics
რიოს ოლიმპიადაზე 65 კგ წონით კატეგორიაში საქართველოს თავისუფალი სტილით მოჭიდავეთა ნაკრებს ზურაბ იაკობიშვილი წარმოადგენს. 24 წლის ქართველი მოჭიდავე თავის წონაში საქართველოს ჩემპიონია. იაკობიშვილი 2015 წელს 23-წლამდელთა ევროპის ჩემპიონატზე ვერცხლის მედლის მფლობელი გახდა. 2016 წელს, პრესტიჟულ საერთაშორისო ტურნირზე - მედვედის თასი - იაკობიშვილი ჩემპიონი გახდა. ზურაბ იაკობიშვილი ბოლო მოჭიდავე იყო, ვინც ჩვენს ნაკრებს რიოს ლიცენზია მოუტანა. ეს მონღოლეთში, მსოფლიო სალიცენზიო ტურნირზე მოხდა, როცა იაკობიშვილი ტურნირის ფინალში გავიდა, რაც ლიცენზიის მოსაპოვებლად სრულიად საკმარისი იყო და ამით თავისუფლების გუნდი სრულად შეივსო. ამ წონაში ტრადიციულად დომინირებენ აზერბაიჯანელი, რუსი, ამერიკელი მოჭიდავეები. კარიოკა არენაზე ასპარეზობა 17 საათიდან დაიწყება. #ცეცხლიაინთო #Rio2016 #Olympics
რიოს 2016 წლის ზაფხულის ოლიმპიურ თამაშებზე საქართველოს ბოლო წარმომადგენელი ელიზბარ ოდიკაძე იქნება, რომელიც თავისუფალი სტილით მოჭიდავეთა ნაკრების 97 კგ წონითი კატეგორიის ფალავანია. ათლეტური აღნაგობის მოჭიდავე ევროპის 2015 და 2016 წლების ჩემპიონატების ვერცხლისა და ბრინჯაოს პრიზიორია. მას ორჯერ აქვს მოგებული ოქროს გრან-პრი. ოდიკაძე ონდოეთის კლუბ “რევანტა მუმბაი გარუნდაში” ირიცხება, რომლის შემადგენლობაშიც 2015 წელს ის პირველი საკლუბო ჩემპიონატის გამარჯვებული გახდა. ოდიკაძის ბოლო ჯილდო რიგაში გამართული ევროპის წლევანდელი ჩემპიონატის ბრინჯაოს მედალია. გადამწყვეტ შეხვედრაში ქართველმა მოჭიდავემ ლონდონის ოლიმპიადის ვერცხლის პრიზიორი, უკრაინელი ვალერი ანდრეიცევი დაამარცხა. ოლიმპიურ ხალიჩაზე ელიზბარ ოდიკაძის მთავარ კონკურენტებად მოიაზრებიან ამერიკელი მსოფლიოს მოქმედი ჩემპიონი - კაილ სნაიდერი; აზერბაიჯანელი ხეთაგ გაზიუმოვი - ოლიმპიური თამაშების ორგზის ბრინჯაოსმედალოსანი. სომხეთის სახელით მოასპარეზე გამოცდილი გიორგი კეტოევი; დაღესტნელი უზბეკი მაგომედ იბრაგიმოვი და სხვა გამოცდილი ფალავნები. ელიზბარ ოდიკაძე კარიოკა არენაზე 17 საათიდან გამოჩნდება. მისი გამოსვლის შემდეგ, საქართველოს ოლიმპიური ნაკრები რიოში ასპარეზობას ოფიციალურად დაასრულებს. #ცეცხლიაინთო #Rio2016 #Olympics
დღეს, რიოს ხალიჩაზე საქართველოს თავისუფალი სტილით მოჭიდავეთა ნაკრების ერთ-ერთი მთავარი იმედი, მძიმეწონოსანი გენო პეტრიაშვილი გამოვა. გორელი მოჭიდავე ევროპის მოქმედი ჩემპიონია. მსოფლიო ჭიდაობის ფედერაციის რეიტინგში გენო პეტრიაშვილი მძიმე წონის პირველი ნომერია და ცხადია, რომ ის ყველასთვის არასასურველი მეტოქე იქნება. 22 წლის გენო პეტრიაშვილს ახალგაზრდებს შორის ყველა დიდი ტურნირი აქვს მოგებული. უფროს ასაკში ის 2013 და 2015 წლების მსოფლიო ჩემპიონატების ბრინჯაოს პრიზიორია. 2015 წელს, ბაქოს პირველ ევროპულ თამაშებზე მან მესამე ადგილი დაიკავა. 2016 წელს კი, გენომ რიგაში, ევროპის ჩემპიონატზე გაიბრწყინა და კონტინენტის ჩემპიონი გახდა. გენო პეტრიაშვილს ისეთ ვარსკვლავებთან მოუწევს დაპირისპირება, როგორებიც რუსი 3-გზის მსოფლიო ჩემპიონი ბილიალ მახოვია. უძლიერეს კონკურენტებად მოიაზრებიან ირანელი კომეილ გასემი, რომელიც ოლიმპიადის ბრინჯაოს პრიზიორია და თურქი მოჭიდავე ტაჰა აკგული - მსოფლიოსა და ევროპის ჩემპიონი. ოლიმპიადაზე მძიმე წონაში სომხეთის სახელით იჭიდავებს ლევან ბერიანიძე. #ცეცხლიაინთო #Rio2016 #Olympics
დღეს, თავისუფალი სტილით მოჭიდავეთა ნაკრებიდან ხალიჩაზე 86 კგ წონითი კატეგორიის ფალავანი - სანდრო ამინაშვილი გავა. ამინაშვილი საქართველოს ჩემპიონია. მისი საერთაშორისო ტიტულებიდან კი, გამოსარჩევი 2015 წელს, ლას ვეგასის მსოფლიო ჩემპიონატზე მოპოვებული ბრინჯაოს მედალი და ამავე წელს, ბაქოს პირველ ევროპულ თამაშებზე დაკავებული მესამე ადგილია. ამავე წლის ევროპის ჩემპიონატზე სანდრომ ასევე ბრინჯაოს მედლის მოგება შეძლო. მსოფლიო ჭიდაობის ფედერაციის განახლებულ, აგვისტოს თვის რეიტინგ-ლისტში 86 კგ წონით კატეგორიაში ამინაშვილი მე-10 პოზიციაზეა. რიოს ოლიმპიური თამაშების ლიცენზია სანდრო ამინაშვილმა ესპანეთის გრან-პრის შემდეგ მოიპოვა, სადაც პირველ წრეში ის წონის ლიდერს - დავით მარსაგიშვილს შეხვდა და დაამარცხა. სწორედ, ურთიერთშეხვედრაში გამარჯვებით გაინაღდა ამინაშვილმა ოლიმპიადის საგზური. ოლიმპიურ თამაშებზე 86 კგ წონით კატეგორიაში საოცრად დიდი კონკურენციაა. ამ წონაში ასპარეზობენ ისეთი ტიტულოვანი სპორტსმენები, როგორებიც არიან აბდულრაშიდ სამულაევი - 2-გზის მსოფლიოს ჩემპიონი, რომელსაც მეტსახელად “რუსულ ტანკს” უწოდებენ. შარიფ შარიფოვი - აზერბაიჯანელი ოლიმპიური ჩემპიონი. ექსტრაორდინალური ამერიკელი ჯეიდენ კოქსი, პუერტო რიკოელი ხაიმე ესპინალი, რომელიც ლონდონის ოლიმპიადის ვერცხლის პრიზიორია. კარიოკა არენაზე საჭიდაო სესია 17 საათიდან დაიწყება. #ცეცხლიაინთო #Rio2016 #Olympics
თავისუფალი სტილით მოჭიდავეთა ნაკრებიდან რიოს ხალიჩაზე ასპარეზობას პირველი მსოფლიოსა და ევროპის ჩემპიონი - ვლადიმერ ხინჩეგაშვილი დაიწყებს. 25 წლის გორელი მოჭიდავე ოლიმპიურ თამაშებზე უკვე მეორედ გამოვა. ხინჩეგაშვილის ოლიმპიური დებიუტი 2012 წელს, ლონდონში შედგა და დებიუტანტის კვალობაზე, საკმაოდ წარმატებული გამოდგა. მაშინ ლადომ ფინალში გასვლა შეძლო და საბოლოოდ, ვერცხლის მედალს დაეუფლა. ხინჩეგაშვილისთვის განსაკუთრებით ნაყოფიერი და წარმატებული 2014 -15 წლები გამოდგა. 2014 წელს, ტაშკენტში გამართულ მსოფლიო ჩემპიონატზე ხინჩეგაშვილი ვიცე-ჩემპიონი გახდა. ამავე წელს, ფინეთში მან ევროპის ჩემპიონის ტიტული პირველად მოიპოვა. 2015 წელს, ლას ვეგასის მსოფლიო ჩემპიონატზე ლადო უკვე კვარცხლბეკის უმაღლეს საფეხურზე ავიდა და მსოფლიო ჩემპიონი გახდა. ამასთან, ამ გამარჯვებით ხინჩეგაშვილი გახდა პირველი ქართველი თავისუფალი სტილით მოჭიდავე, რომელმაც ტიტული 10-წლიანი პაუზის შემდეგ პირველად მოიპოვა. 2016 წელს, რიგაში გამართულ ევროპის ჩემპიონატზე, მსოფლიოს მოქმედმა ჩემპიონმა თავის ევროპულ მედლებს კიდევ ერთი ოქრო შემატა. თავისუფალი სტილით მოჭიდავეთა მსოფლიო რეიტინგში ლადო ხინჩეგაშვილი პირველი ნომერია. 2015 წელს, ის საქართველოს საუკეთესო მამაკაც სპორტსმენად დასახელდა. ოლიმპიური ხალიჩა ქართველი მოჭიდავისთვის უცხო არ არის. ბოლო 4 წელში დაგროვებული ტიტულები და გამოცდილება მას წარმატების მიღწევაში აუცილებლად დაეხმარება. პოპულარული და წარმატებული სპორტსმენისგან გულშემატკივრები მაქსიმუმს ითხოვენ და დიდი ალბათობით, საქართველოს მორიგ ოლიმპიულ მედალს სწორედ ლადო ხინჩეგაშვილი შემატებს. #ცეცხლიაინთო #Rio2016 #Olympics
რიოს ოლიმპიურ არენაზე საასპარეზოდ ტანმოვარჯიშეები გამოვლენ. ქართველი ოლიმპიელი - სალომე ფაჟავა სადებიუტო ოლიმპიურ თამაშებზე წარმატების მიღწევას 96 სპორტსმენთან შეჯიბრში შეეცდება. სალომე ფაჟავა ასპარეზობას მრავალჭიდის საკვალიფიკაციო ეტაპიდან დაიწყებს. იმ ქართველ სპორტსმენებს შორის, რომლებმაც რიოს ოლიმპიადის ლიცენზიები მოიპოვეს, ერთ-ერთი პირველი სწორედ სალომე ფაჟავა იყო. 18 წლის მხატვრული ტანმოვარჯიშე 2000 წლის შემდეგ პირველად ამ სახეობაში საქართველოს წარადგენს. სალომეს ტიტულების ჩამონათვალი უკვე საკმაოდ სოლიდურია: ბრინჯაოს მედალი იუნიორთა მსოფლიო ჩემპიონატზე, ბრინჯაო ბაქოს პირველ ევროპულ თამაშებზე, ორი ბრინჯაო მოსკოვის გრან-პრიზე… ბოლო მსოფლიო ჩემპიონატზე სალომე ლიცენზიის ასაღებად გაემგზავრა და მიზანსაც მიაღწია. საერთო ჩათვლაში, მან მეოთხე ადგილი დაიკავა. რიოს ოლიმპიადაზე სალომე მთავარ ფავორიტებად რუს ტანმოვარჯიშეებს მიიჩნევს. მისი კონკურენტები ასევე არიან უკრაინელი ანა რიზადტინოვა, ბელარუსი მელეტინა სტანიუტა და კორეელი ან ჯი. 18 წლის ტანმოვარჯიშე თვლის, რომ ოლიმპიურ თამაშებზე მოხვედრით პროგრამა მინიმუმი შეასრულა. ახლა კი, მედლის მოპოვების დროა. #ცეცფხლიაინთო #Rio2016 #Olympics
74 კგ წონით კატეგორიაში საქართველოს ღირსებას იაკობ მაქარაშვილი დაიცავს. მაქარაშვილი საქართველოს მოქმედი ჩემპიონია. 2016 წლის ევროპის ჩემპიონატზე მან ბრინჯაოს მედალი მოიგო. ოლიმპიური ლიცენზია ქართველმა მოჭიდავემ მიმდინარე წლის აპრილში - სერბეთში გამართულ საერთაშორისო სალიცენზიო ტურნირზე მოიპოვა. მაშინ მაქარაშვილი ტურნირის ფინალში გავიდა და საბოლოოდ, ვერცხლის მედალს დასჯერდა. რიოს ხალიჩაზე ქართველი სპორტსმენის ტრადიციული მეტოქეები და წონის გამორჩეულად ძლიერი წარმომადგენლები ამერიკელი, ირანელი აზერბაიჯანელი, რუსი და კუბელი მოჭიდავეები იქნებიან. წინასწარი შეხვედრები კარიოკა არენაზე 17 საათიდან დაიწყება. #ცეცხლიაინთო #Rio2016 #Olympics
რიოს 2016 წლის ოლიმპიადის ვერცხლის პრიზიორ ხუან მარტინ დელ პოტროს არგენტინაში განსაკუთრებული დახვედრა მოუწყვეს. მძიმე ტრამვის შემდგომ დაბრუნებულმა დელ პოტრომ, შეძლო და ოლიმპიადის პირველ წრეში დაამარცხა მსოფლიოს პირველი ჩოგანი ნოვაკ ჯოკოვიჩი, ნახევარფინალური შეხვედრა მოუგო რაფაელ ნადალს, ხოლო 4:04 საათიან ფინალურ ორთაბრძოლაში დამარცხდა ბრიტანელ, მე-2 ჩოგან ენდი მარისთან. ხუან მარტინ დელ პოტრო შინ, არგენტინაში, მშობლიურ ქალაქ ტანდილში დაბრუნდა. გულშემატკივრებით გადაჭედილი ქუჩები ოვაციებით შეხვდა „გმირს“. არგენტინელმა სპორტსმენმა განაცხადა რომ ოლიმპიური მედლის მოგებით მას ოცნება აუხდა. #ცეცხლიაინთო #Rio2016 #Olympics
რიოს ოლიმპიურ პარკში კამერა ჩამოვარდა, რომელიც ჰაერში მუშაობდა და პარკის ზედხედებს იღებდა. ინციდენტის შედეგად 7 ადამიანი დაშავდა. #ცეცხლიაინთო #Rio2016 #Olympics
დღეს, რიოცენტროს პავილიონის ფიცარნაგზე ქართველი მძიმეწონოსანი გოლიათი და წონის ერთ-ერთი ლიდერი - 22 წლის ლაშა ტალახაძე გამოვა და ასპარეზობას A ჯგუფში დაიწყებს. ასაკის მიუხედავად, ძალოსნობის სამყაროში ლაშა უკვე კარგად ცნობილი სპორტსმენია. მისი ტალანტის, პოტენციალისა და შესაძლებლობების შესახებ ყველამ კარგად იცის. 2013 წელს, ახალგაზრდულ ასაკში ლაშამ მსოფლიო ჩემპიონის ტიტული პერუში მოიპოვა. 2015 წელს, ჰიუსტონში გამართულ მსოფლიო ჩემპიონატზე, +105 კგ წონით კატეგორიაში ლაშა მსოფლიოს ვიცე-ჩემპიონი გახდა. მან საერთო ჯამში 454 კილოგრამი დაძლია. ხოლო მას შემდეგ, რაც ჩემპიონი ალექსეი ლოვჩევი დოპინგის ტესტზე ჩავარდა, ჩემპიონის ტიტული ლაშას გადაეცა. 2016 წელი ახალგაზრდა სპორტსმენისთვის ძალიან წარმატებულად დაიწყო. ნორვეგიის ქალაქ ფერდეში გამართულ ევროპის ჩემპიონატზე ტალახაძემ ჯამში 463 კგ დაძლია და ევროპის ჩემპიონი გახდა. ხოლო ატაცში 212 კგ-ს დაძლევით ევროპის ახალი რეკორდი დაამყარა. ძალოსნობის საერთაშორისო ფედერაციის სარეიტინგო სიაში, ლაშა ტალახაძე თავისი წონის ლიდერია. გასაკვირი არაა, რომ ახალგაზრდა ძალოსნისგან ყველა ოლიმპიურ მედალს ელის. ლაშასაც შორსმიმავალი გეგმები აქვს. დიდი შანსია, საქართველოს ჰიმნი სწორედ დღეს, რიოცენტროს პავილიონში მოვისმინოთ. #ცეცხლიაინთო #Rio2016 #Olympics
98 კგ წონით კატეგორიაში საქართველოს ბერძნულ-რომაული სტილით მოჭიდავეთა ნაკრების ღირსებას რევაზ ნადარეიშვილი დაიცავს. ფიზიკურად ძლიერი, ათლეტური აღნაგობის მოჭიდავე ახალგაზრდებში მსოფლიოს ჩემპიონია. ეს ტიტული ნადარეიშვილმა 2011 წელს მოიპოვა და მაშინ 84 კგ წონით კატეგორიაში გამოდიოდა. 2013 წლიდან, ნადარეიშვილი უკვე უფროს ასაკში ჭიდაობს. 2015 წლიდან მან ერთი წონით ზემოთ აინაცვლა და ახალ წონაში საქართველოს ჩემპიონატის ვერცხლის პრიზიორი გახდა. 2016 წელს, 98 კგ წონით კატეგორიაში ნადარეიშვილი უკვე უპირობო ფავორიტი იყო და ეს შედეგშიც აისახა - მან საქართველოს ჩემპიონის ტიტული მოიპოვა. რიოს ოლიმპიადის ლიცენზია ნადარეიშვილმა მიმდინარე წლის აპრილში, ულან-ბატორში გამართულ მსოფლიოს სალიცენზიო ტურნირზე მოიპოვა. ქართველი მოჭიდავე ფინალში გავიდა და ბელარუს მოჭიდავესთან ბრძოლაში ვერცხლის მედალს დასჯერდა. რიოს ხალიჩაზე ქართველი ფალავანი 17 საათიდან გამოჩნდება. #ცეცხლიაინთო #Rio2016 #Olympics
დღეს, რიოს საჭიდაო ხალიჩაზე ბერძენ-რომაელთა 66 კგ წონითი კატეგორიის ფალავნები გამოვლენ. საქართველოს ღირსებას ახალგაზრდებში მსოფლიო ჩემპიონი - შმაგი ბოლქვაძე დაიცავს. 22 წლის შმაგი ბოლქვაძე ევროპის 2016 წლის ჩემპიონატის ბრინჯაოსმედალოსანია. ახალგაზრდული ნაკრების შემადგენლობაში მსოფლიო ჩემპიონის ტიტული კი, ბოლქვაძემ 2014 წელს, ზაგრებში მოიპოვა. 2016 წლის იანვარში, უფროს ასაკში, შმაგი ბოლქვაძე პირველად გახდა 66 კგ წონით კატეგორიაში საქართველოს ჩემპიონი. ბერძენ-რომაელთა ნაკრებიდან შმაგი ბოლქვაძე პირველი იყო, ვინც რიოს ოლიმპიადის ლიცენზია მოიპოვა. ქართველმა მოჭიდავემ ეს ნორმატივი სერბეთის საერთაშორისო სალიცენზიო ტურნირზე შეასრულა. ბოლქვაძე გამორჩეულად ბრძოლისუნარიანი მოჭიდავეა; პოზიციებს არასდროს თმობს და ბოლო წამამდე იბრძვის. სადებიუტო ოლიმპიურ თამაშებზე ახალგაზრდა მოჭიდავეს წინსვლის საკმაოდ კარგი და რეალური შანსები აქვს. #ცეცხლიაინთო #Rio2016 #Olympics
რობერტ კობლიაშვილი 85 კგ წონით კატეგორიაში საქართველოს 2016 წლის ჩემპიონია. 23 წლის ფალავანი ოლიმპიურ თამაშებზე ევროპის მოქმედი ვიცე-ჩემპიონის სტატუსით ჩავიდა. კობლიაშვილმა რიოს ლიცენზია მიმდინარე წელს, სტამბოლში გამართულ მსოფლიოს ბოლო სალიცენზიო ტურნირზე მოიპოვა. თანაგუნდელთა უმრავლესობის მსგავსად, რიო 2016 კობლიაშვილის სადებიუტო ოლიმპიური თამაშებია. რობერტ კობლიაშვილს წარმატებები ახალგაზრდულ ასაკში მრავლად ჰქონდა. უფროსებში გადმოსვლის შემდეგ, მან ოქროს გრან-პრის მოგება შეძლო, ერთხელ ვერცხლის მედალს დაეუფლა და თავი რამდენიმე საერთაშორისო ტურნირზე გამოიჩინა. 85 კგ წონით კატეგორიას, თავისი ფავორიტები ჰყავს, მათში ქართველი მოჭიდავეც მოიაზრება. კობლიაშვილის გამორჩეულად ძლიერი კონკურენტები რუსეთის სახელით მოასპარეზე დავით ჩაკვეტაძე, ირანელი ჰაბიბოლა ახლაგი, აზერბაიჯანელი სამან ტაჰმასები, ამერიკელი ბენ პროვიზორი და უკრაინის სახელით მოჭიდავე ჟან ბელენიუკი იქნებიან. სწორედ, ამ უკანასკნელთან დათმო კობლიაშვილმა ევროპის წლევანდელი ჩემპიონატის ფინალი და ახლა რიოში სავარაუდოდ რევანშის შანსი ექნება. #ცეცხლიაინთო #Rio2016 #Olympics
რიოს საჭიდაო ხალიჩაზე დღეს ბერძნულ-რომაული სტილით მოჭიდავეთა ნაკრების ყველაზე მძიმე ფალავანი- იაკობ ქაჯაია გავა. ქაჯაია ახალგაზრდებში 2013 წლის ევროპის ჩემპიონია. ქართველ მძიმეწონოსანს მსოფლიოსა და ევროპის ჩემპიონატების ბრინჯაოს მედლებიც აქვს მოპოვებული. 2014 წელს, იაკობ ქაჯაიამ ორჯერ მოახერხა ოქროს გრან-პრის მოგება. 2015 წელს ჯერ ახალგაზრდებში გახდა საქართველოს ჩემპიონი; 2016 წელს კი, ეს შედეგი უფროს ასაკში გაიმეორა. საქართველოს ჩემპიონი წელს ევროპის 23-წლამდელთა ჩემპიონატის ტრიუმფატორიც გახდა. 22 წლის ქაჯაია ათლეტური და ფიზიკურად ძალიან ძლიერი მოჭიდავეა. ის ბევრ ილეთს აკეთებს და კონკურენტებს დგომიდანაც მშვენივრად აგდებს. ქაჯაია ტაქტიკურად კარგადაა მომზადებული. ბერძენ-რომაელთა შორის მძიმე წონაში საკმაოდ მძაფრი კონკურენციაა. ტრადიციულად, პოზიციებს არ თმობენ ირანელები, თურქები, კუბელები. წონის ლიდერებს შორის არიან ამერიკელი რობი სმიტი, ესტონელი ჰეიკი ნაბი და ბრაზილიის დროშის ქვეშ მოასპარეზე ედუარდ სოგომონიანი. #ცეცხლიაინთო #Rio2016 #Olympics
ბერძნულ-რომაული სტილით მოჭიდავეებიდან, რიოს ხალიჩაზე პირველი ზურაბ დათუნაშვილი გავა. 75 კგ წონით კატეგორიაში მოასპარეზე დათუნაშვილი ევროპის მოქმედი ჩემპიონია. 25 წლის მოჭიდავე თავისი ორიგინალური საჭიდაო სტილით გამორჩეული სპორტსმენია. ზოგჯერ ის იშვიათ და დაუჯერებელ ილეთებს აკეთებს. 2012 წელს, დათუნაშვილი ლონდონის ოლიმპიურ თამაშებში მონაწილეობდა. 74 კგ წონით კატეგოგრიაში მან პირველი ორი წრე დამაჯერებლად გაიარა; მეოთხედფინალში კი, აზერბაიჯანელ მოჭიდავესთან დამარცხდა. 2013 წელს, თბილისში გამართულ ევროპის ჩემპიონატზე დათუნაშვილმა ვერცხლის მედალი მოიპოვა. 2016 წელს, რიგაში ქართველი მოჭიდავე ევროპის ჩემპიონის კვარცხლბეკზე ავიდა და ახლა, რიოს ოლიმპიურ თამაშებზე თავის წონაში ევროპის მოქმედი ჩემპიონის სტატუსით გამოვა. კარიოკა არენაზე ასპარეზობა 17 საათიდან დაიწყება და მას საზოგადოებრივი მაუწყებელი პირდაპირ ეთერში შემოგთავაზებთ. #ცეცხლიაითო #Rio2016 #Olympics
მაიკლს ფელპსმა რიოს 2016 წლის ოლიმპიადაზე მე-4, ხოლო კარიერაში 21-ე ოლიმპიური ოქროს მედალი მოიპოვა. ამერიკელი მოცურავის გამოსვლის დროს, ამერიკული ფეხბურთის უმაღლესი ლიგის, NFL-ის მატჩი, "რავენსისა" და "პანტერების" დაპირისპირება მე-4 პერიოდში შეწყდა და მხოლოდ მას შემდგომ გაგრძელდა, რაც მაიკლ ფელპსმა 22-ე ოქროს მედალი მოიპოვა. #ცეცხლიაინთო #Rio2016 #Olympics
რიოს ოლიმპიადაზე სიგრძეზე ხტომაში საქართველოს ბაჩანა ხორავა წარადგენს. 1980 წლის შემდეგ, 2012 წლის ლონდონის ოლიმპიადამდე საქართველოს სახელით ამ დისციპლინაში არავის უასპარეზია. ლონდონში საქართველოს ოლიმპიური ნაკრების შემადგენლობაში ბოლესლავ სხირტლაძე იყო. ახლა კი, სიგრძეზე ხტომის ესტაფეტა ბაჩანა ხორავამ გადაიბარა. რიოს ოლიმპიადის ლიცენზია ხორავამ მძლეოსნობაში საქართველოს ჩემპიონატზე მოიპოვა. ბრაზილიაში მოსახვედრად 8 მეტრსა და 18 სან ტიმეტრზე გადახტომა იყო საჭირო. ბაჩანა კი, 8 მეტრსა და 25 სანტიმეტრზე გადახტა. 2015 წელს, ბაქოს პირველ ევროპულ თამაშებზე სიგრძეზე ხტომაში ბაჩანა ხორავამ გაიმარჯვა; 7 მეტრსა და 64 სანტიმეტრზე გადახტა და ამით თამაშების რეკორდი დაამყარა. ამ წელსვე, ხორავამ 23-წლამდელთა ევროპის ჩემპიონატზე ბრინჯაოს მედლის მოპოვება შეძლო. რიოს ოლიმპიადა ბაჩანა ხორავასთვის პირველია. სპორტსმენი ფიქრობს, რომ თუ შედეგის გამეორებას შეძლებს და 8 მეტრსა და 25 სანტიმეტრზე გადახტება, ეს ძალიან კარგი მაჩვენებელი იქნება. #ცეცხლიაინთო #Rio2016 #Olympics
ლუბა გოლოვინა საქართველოს ოლიმპიური ნაკრების ერთადერთი ბატუტზე მხტომელი სპორტსმენია. გოლოვინა საყოველთაო ყურადღების ცენტრში მაშინ მოექცა, როდესაც ახალგაზრდებში მსოფლიოსა და ევროპის ჩემპიონატები მოიგო. ის სხვადასხვა საერთაშორისო ტურნირების არაერთგზის გამარჯვებული და პრიზიორია. სპორტსმენების ოჯახის წარმომადგენელი 3 წლის ასაკიდან ვარჯიშობს და პირადი მწვრთნელი მისი მამა - ვლადიმერ გოლოვინია. 26 წლის გოლოვინასთვის რიოს ოლიმპიური თამაშები უკვე მესამე ოლიმპიადაა. მისი ოლიმპიური დებიუტი 2008 წელს, პეკინში შედგა და მაშინ, 18 წლის სპორტსმენმა მეექვსე ადგილის დაკავება შეძლო. 2012 წელს, ლონდონში ლუბა მე-8 იყო. კვალიფიკაციიდან ფინალურ ეტაპზე მოხვედრა გოლოვინასთვის პრობლემა არასდროს ყოფილა. ქართველი სპორტსმენი ახლაც იმედიანადაა განწყობილი და მთავარ კონკურენტებად, ტრადიციულად, ჩინელ, კანადელ და ბრიტანელ სპორტსმენებს მიიჩნევს. გოლოვინა იმედოვნებს, რომ რიოს ოლიმპიადაზე მთელი ცხოვრების ოცნებას აიხდენს და სამშობლოში ოლიმპიური მედლით დაბრუნდება. #ცეცხლიაინთო #Rio2016 #Olympics
რიოს ოლიმპიადის მეხუთე დღე წვიმიანი იყო. ამის გამო, ყველა საჩოგბურთო მატჩი გადაიდო და ორგანიზატორები ამაოდ ამშრალებდნენ დასველებულ კორტებს. საქართველოს ოლიმპიურ ნაკრებს ვერცხლის მედალი ვარლამ ლიპარტელიანმა შემატა. საფრანგეთის ცხენოსანთა გუნდმა ამ დღეს ყველაფერი მოიგო. ავსტრალიელმა მოცურავემ - კაილ ჩალმერსმა 100 მეტრიან დისტანციაზე ოქროს მედალი დაისაკუთრა. #ცეცხლიაინთო #Rio2016 #Olympics
ოლიმპიადაზე მიმდინარე საფეხბურთო ტურნირზე მეოთხედფინალისტთა ვინაობა გაირკვა. საუკეთესო რვა გუნდს შორის მოხვდა, ბრაზილიის 23 წლამდე ნაკრები, რომელმაც ბოლო ტურის შეხვედრა ნეიმარის გარეშე, დანიის ნაკრების წინააღმდეგ გამართა და მეტოქეს 4 უპასუხო გოლი გაუტანა. მეოთხედფინალური წყვილები: ბრაზილია vs კოლუმბია გერმანია vs პორტუგალია სამხრეთ კორეა vs ჰონდურასი ნიგერია vs დანია #ცეცხლიაინთო #Rio2016 #Olympics
ფიჯის 7-კაცა რაგბის ნაკრები ოლიმპიური ჩემპიონია! ფიჯელებმა ფინალში დიდი ბრიტანეთის გუნდი 43:7 დაამარცხეს და ქვეყნის ისტორიაში პირველად ოლიმპიური ოქრო მოიპოვეს. ამ ამბავმა ფიჯიში საოცარი რეზონანსი გამოიწვია. სიხარულისგან გადარეული მოსახლეობა ქუჩაში დროშებით გამოვიდა. ქუჩებში ტრანსპორტის მოძრაობაც შეწყდა. ფიჯელები წარმატებას დიდხანს ზეიმობდნენ. #ცეცხლიაინთო #Rio2016 #Olympics
ადამ ოქრუაშვილი ნაკრების ერთ-ერთი ყველაზე სტაჟიანი წევრია. მსოფლიოს ბრინჯაოს პრიზიორი და ბაქოს 2015 წლის თამაშების გამარჯვებული ოლიმპიურ ტატამზე კარიერაში მეორედ გავა. ქართველი მძიმეწონოსანი არაერთი პრესტიჟული ტურნირის გამარჯვებული და პრიზიორია. საქართველოს ნაკრებთან ერთად, ოქრუაშვილმა ევროპის გუნდური ჩემპიონატი 4-ჯერ მოიგო. 2013 წელს კი, მსოფლიოს გუნდური ჩემპიონობაც იზეიმა. ოქრუაშვილის მედლების კოლექციაში ევროპის ჩემპიონატებზე მოპოვებული ორი ვერცხლი, მსოფლიოს 2013 წლის ჩემპიონატის ბრინჯაო და 2015 წლის ბაქოს პირველი ევროპული თამაშების ოქროს მედალია. რა თქმა უნდა, ამ ჩამონათვალშია გრანდ-სლემებზე, მასტერსებსა და გრან-პრიზე მოგებული მედლები. რიოს ოლიმპიადაზე ადამ ოქრუაშვილი ბრძოლაში პირველივე წრიდან ჩაერთვება. ქართველი მძიმეწონოსანი საკმაოდ რთულ ბადეში მოხვდა. მისი პირველი მეტოქე იაპონელი ჰისაოში ჰარასავა იქნება. წონის უპირობო ლიდერი კი, ფენომენალური ძალისა და ტალანტის მქონე ფრანგი გოლიათი ტედი რინერია. აქვე არიან სხვა მძიმეწონოსანი ვარსკვლავები - აბდულო ტანგრიევი, იაკივ ხამო, ორ სასონი, ტემულენ ბატულგა. იაპონური ბარიერის დაძლევის შემთხვევაში, მეორე წრეში ოქრუაშვილი აზერბაიჯანის სახელით მოასპარეზე უშანგი კოკაურსა და ლატვიელ არტურს ნიკიფორენკოს შორის გამარჯვებულს შეხვდება. #ცეცხლიაინთო #Rio2016 #Olympics
#ცეცხლიაინთო #Rio2016 #Olympics
20 წლის ბექა ღვინიაშვილი ნაკრების ყველაზე ახალგაზრდა წევრია. ღვინიაშვილმა კარიერა 81 კგ-ში დაიწყო. შემდეგ, ასპარეზობა 90 კგ წონით კატეგორიაში გააგრძელა. თუმცა, მალევე 100 კგ-ში აინაცვლა და ასაკის მიუხედავად, ყველასთვის ანგარიშგასაწევ ძალად ითვლება. იუნიორებსა და ახალგაზრდებს შორის, ღვინიაშვილი ყოველთვის გამოკვეთილი ფავორიტი იყო. ამაზე კარგად მეტყველებს ამ ასაკში მისი მოგებული უამრავი ჯილდო და სხვადასხვა სინჯის მედლები. 2013 წელს, 21-წლამდე ასაკში ბექამ დუბლი შეასრულა და 90 კგ წონით კატგორიაში ჯერ ევროპის, შემდეგ კი, მსოფლიო ჩემპიონი გახდა. ამავე წელს, ძიუდოს საერთაშორისო ფედერაციამ ქართველი სპორტსმენი საუკეთესო ახალგაზრდა ძიუდოიტად დაასახელა. 2014 წელს, მან კვლავ მოიგო ევროპის ჩემპიონატი. 2014 წლიდან დღემდე, ბექამ ოთხი გრან-პრი, ერთი მასტერსი და ერთი გრანდ-სლემი მოიგო. ახლა, სადებიუტო ოლიმპიადაზე ისეთ ვარსკვლავებთან მოუწევს ძალების მოსინჯვა, როგორებიც არიან ჰენკ გროლი, ტუვშინბაიარ ნაიდანი, ლუკაშ კრპალეკი, რინოსუკე ჰაგა და ტაგირ ხაიბულაევი. ბექა ასპარეზობაში მეორე წრიდან ჩაერთვება და მისი პირველი მეტოქე ბრიტანელი ბენჯამინ ფლეტჩერი იქნება. კარიოკა არენაზე შეხვედრები ტრადიციულად 17 საათიდან დაიწყება. #ცეცხლიაინთო #Rio2016 #Olympics
გარდა იმისა, რომ ამერიკის მოცურავეთა ოლიმპიური ნაკრები შესანიშნავი სპორტსმენებითაა დაკომპლექტებული, როგორც აღმოჩნდა, ისინი საკმაოდ მუსიკალურები არიან. ასე რომ, მღერის მაიკლ ფელპსი და კომპანია. #Rio2016
ოლიმპიურ თამაშებზე მეოთხე დღე მოვლენებით დატვირთული გამოდგა, რამდენიმე სენსაციური შედეგი დაფიქსირდა, ოლიმპიურმა აუზმა ყურადღება კიდევ ერთხელ მიიპყრო, ამჯერად არასპორტული კუთხით. მაიკლ ფელფსი კვლავ არავის არაფერს უთმობს, გუშინ მან მორიგი ორი ოქრო მოიპოვა, საერთო ჯამში უმაღლესი სინჯის მედლების რაოდენობა 21-მდე გაზარდა.; სენსაციები გრძელდება სჩოგბურთო ასპარეზობებში, ოლიმპიადაზე გამოსვლა სერენა უილიამსმაც დაასრულა; ასპროცენტიანი შედეგით ასპარეზობენ ჩინელი წყალში მხტომელი ქალები; განხლივის საგნად იქცა ოლიმპიური აუზი, რომელმაც მწვანე შეფერილობა მიიღო. #ცეცხლიაინთო #Rio2016 #Olympics
უსაინ ბოლტის პრესკონფერენციები მუდამ განსაკუთრებულად მიმდიანრეობს და ხშირად შოუა. ამჯერად, იამაიკელს ნორვეგიელმა ჟურნალისტმა მიმართა... უფრო სწორად, სიტყვა ითხოვა და როცა არავინ ელოდა, რეჩიტატივის წარმოთქმა დაიწყო. ამ პატარა რეპში ჟურნალისტმა ბოლტს უთხრა, რომ ის მისი კერპი და საყვარელი სპორტსმენია. #ცეცხლიაინთო #Rio2016 #Olympics
იაპონიის 7-კაცა რაგბის ნაკრები ოლიმპიადის მიმართ სიხარულისა და საკუთარი დამოკიდებულების გამოსახატად ამღერდა. მორაგბეები აუზში ჩავიდნენ და ორხაზიანი სიმღერა საგანგებოდ მომზადებული ნომრის თანხლებით შეასრულეს. #ცეცხლიაინთო #Rio2016 #Olympics
ძიუდოს ნაკრების კაპიტანი და არაერთი საერთაშორისო ტურნირის გამარჯვებული - ვარლამ ლიპარტელიანი შეეცდება თავის ტიტულებს ოლიმპიური ოქროს შემატოს. 90 კგ წონით კატეგორიაში მოასპარეზე სპორტსმენი 3-გზის ევროპის ჩემპიონი და მსოფლიოს ვიცე-ჩემპიონია. 5-ჯერ გახდა ევროპის გუნდური პირველობების ტრიუმფატორი და ერთხელ - მსოფლიოს გუნდური ჩემპიონატის გამარჯვებული. 90 კგ წონითი კატეგორია ყველაზე ვარსკვლავურია - ილიას ილიადისი, კრისტიან ტოტი, დონჰან გვაკი, კირილ დენისოვი, ეშლი გონსალესი სერიოზულ კონკურენციას ქმნიან. ვარლამ ლიპარტელიანი პირველ შეხვედრას ტაჯიკ ძიუდოისტთან - კომრონშოხ უსტოპირიონთან გამართავს. შეხვედრები 17 საათიდან დაიწყება. #ცეცხლიაინთო #Rio2016 #Olympics
ესტერ სტამი 70 კგ წონით კატეგორიაში საქართველოს ღირსებას დაიცავს. ჰოლანდიელი ძიუდოისტი ქართული დროშის ქვეშ 2014 წლიდან ასპარეზობს. სტამი ახალგაზრდებში ევროპის ჩემპიონია. ასევე, მოგებული აქვს სამი მსოფლიო თასი და არაერთი გრანპრი. საქართველოს სახელით პირველი ოქრო ესტერმა ერთი წლის წინ, მადრიდიში გამართულ ევროპის ღია პირველობაზე მოიპოვა. მიმდინარე წლის აპრილში კი, ყაზანის ევროპის ჩემპიონატზე ვერცხლის მედალს დაეუფლა. რიოს ოლიმპიადა ესტერ სტამისთვის სადებიუტოა. პირველ წრეში ის მონღოლეთის წარმომადგენელს - ნარანარგალ ცენდ-აიუშს დაუპირისპირდება. გამარჯვების შემთხვევაში კი, მეორე წრეში მას კანადელი კელიტა ჟუპანჩიჩი ელის. #ცეცხლიაინთო #Rio2016 #Olympics
1996 წლის ატლანტის ოლიმპიადის შემდეგ პირველად, საქართველოს ოლიმპიურ ნაკრებში მოფარიკავე მოხვდა. 23 წლის სანდრო ბაზაძე თავის პირველ ოლიმპიადაზე გაემგზავრა. ევროპის ახალგაზრდული ჩემპიონატების 2-გზის გამარჯვებულმა ლიცენზია პრაღაში გამართულ ოლიმპიურ საკვალიფიკაციო ტურნირზე მოიპოვა. 23-წლამდელთა შორის ხმლით ფარიკაობაში სანდრო ორჯერ გახდა ევროპის ჩემპიონი. სადებიუტო ოლიმპიურ თამაშებზე სანდრო ბაზაძეს სერიოზული გამოწვევები ელის და ხმალს მსოფლიოში საუკეთესო სპორტსმენებთან გამოცდის. სანდრო ბაზაძე ასპარეზობაში დღეიდან ჩაერთვება და პირველ წრეში მისი მეტოქე ბრაზილიელი რენცო აგრესტა იქნება. #ცეცხლიაინთო #Rio2016 #Olympics
ავთანდილ ჭრიკიშვილს - მსოფლიოსა და ევროპის ჩემპიონს, ძალიან გამოცდილ სპორტსმენს რიოს თამაშებზე ოქროს მედლის მოპოვების უმთავრეს პრეტენდენტად მიიჩნევენ. 2009 წლიდან დღემდე, სხვადასხვა საერთაშორისო ტურნირებზე, ახალგაზრდულ და უფროს ასაკში ჭრიკიშვილს 22 ოქროს მედალი აქვს მოგებული. რიოში, 81 კგ წონით კატეგორიაში ჭრიკიშვილი ოქროს მედლის მოპოვების ერთ-ერთი უმთავრესი კანდიდატია. იგი ასპარეზობას კუბელ ძიუდოისტთან - ივან ფელიპე სილვა მორალესთან ორთაბრძოლით დაიწყებს. კარიოკა არენაზე ძიუდოისტები 17 საათიდან გამოჩნდებიან. #ცეცხლიაინთო #Rio2016 #OLYMPICS
ოლიმპიური თამაშების მესამე დღე წარმატებული საქართველოს დელეგაციისთვის გამოდგა, ლაშა შავდათუაშვილმა ოლიმპიური მედალი ზედიზედ მეორე თამაშებზე მოიპოვა, ამჯერად ბრინჯაო. ამის პარალელურად: ამერიკელი სპორტსმენები ახალ რეკორდებს ოლიმპიურ აუზში ამყარებენ; ნოვაკ ჯოკოვიჩმა რიოში მედლის მოგების ყველა შანსი დაკარგა, იგი წყვილთა თანრიგშიც დამარცხდა; ავსტრალიამ შვიდქალა რაგბიში ოქრო პირველად მოიგო; დრიმ თიმმა მორიგი მეტოქე გაანადგურა, ამჯერად ვენესუელა. 113:69. #ცეცხლიაინთო #Rio2016 #Olympics
კოლუმბიელი ძალოსანი - ოსკარ ფიგეროა ოლიმპიური ჩემპიონი გახდა. ფიგეროა 62 კგ წონით კატეგორიაში ასპარეზობდა და მან ჯამში 318 კგ დაძლია, რაც ოქროს მედლის მოსაპოვებლად საკმარისი აღმოჩნდა. გამარჯვების შემდეგ, კოლუმბიელი სპორტსმენი მაყურებელთა ოვაციების ფონზე, ფიცარნაგზე დიდხანს ტიროდა. შემდეგ მან ფეხსაცმელი გაიხადა და ფიცარნაგზე დააწყო იმის ნიშნად, რომ პროფესიული სპორტიდან წასვლა გადაწყვიტა. #ცეცხლიაინთო #Rio2016 #Olympics
ლეგენდარულმა იამაიკელმა მორბენალმა - უსაინ ბოლტმა, რიოში გამართული პრესკონფერენციის დასასრულს დარბაზში პროფესიონალ მოცეკვავეებთან ერთად სამბა იცეკვა, რაც არცთუ ურიგოდ გამოუვიდა. #ცეცხლიაინთო #Rio2016 #Olympics
მშვილდოსანი ხათუნა ნარიმანიძე საქართველოს ოლიმპიური ნაკრების ერთ-ერთი ყველაზე სტაჟიანი წევრია. 2014 წლიდან ის საქართველოს მშვილდოსნობის ფედერაციის პრეზიდენტია. 2015 წლის ბაქოს პირველ ევროპულ თამაშებზე, შერეულ წყვილებში ნარიმანიძემ ვერცხლის მედალი მოიპოვა. ამავე წელს, ქართველი სპორტსმენი სლოვენიაში ევროპის ვიცე-ჩემპიონი გახდა და საქართველოს წლის საუკეთესო ქალ სპორტსმენადაც დაასახელეს. რიოს ოლიმპიადაზე, ინდივიდუალურ ჩათვლაში ხათუნა ნარიმანიძე ბრძოლაში დღეიდან ჩაერთვება. სამბოდრომოზე მისი პირველი მეტოქე უკრაინელი ლიდია სიჩენიკოვა იქნება, ასპარეზობები 16 საათიდან დაიწყება. #ცეცხლიაინთო #Rio2016 #OLYMPICS
#ცეცხლიაინთო #RIO2016 #OLYMPICS
ოლიმპიური თამაშების მეორე დღე საინტერესო და სენსაციებით სავსე აღმოჩნდა. მაიკლ ფელფსმა თავისი ოქროს მედლების კოლექცია 19-მდე გაზარდა; ადამ პიტიმ ბრიტანეთს პირველი ოქრო მოუტანა; საჩოგბურთო ტურნირს პირველივე წრეში, ხუან მარტინ დელ პოტროსთან დაპირისპირებაში გამოეთიშა ნოვაკ ჯოკოვიჩი; პირველ წრეში დაასრულეს ასპარეზობა წყვილთა თანრიგში დებმა უილიამსებმა; ზედიზედ მეორე უგოლო ფრე, ამჯერად ირანის ნაკრებთან ითამაშა ბრაზილიის საფეხბურთო გუნდმა... #ცეცხლიაინთო #RIO2016 #Olympics
დღეს, რიოს ტატამზე ნაკრების ერთადერთი ოლიმპიური ჩემპიონი - ლაშა შავდათუაშვილი გამოვა. 24 წლის შავდათუაშვილი 73 კგ წონით კატეგორიაში იასპარეზებს. #ცეცხლიაინთო #Rio2016 #Olympics
სენსაცია დაფიქსირდა რიოს საჩოგბურთო კორტებზე. პირველივე წრეში ასპარეზობას ნოვაკ ჯოკოვიჩი გამოეთიშა. სერბი ჩოგბურთელი ხუან მარტინ დელ პოტროსთან ორ სეტში - 6:7, 6:7 დამარცხდა, რის შემდეგაც ნოვაკმა ტირილი ვერ შეიკავა და რიოს ოლიმპიურ თამაშებს ცრემლებით დაემშვიდობა. #ცეცხლიაინთო #Rio2016 #Olympics
ბრიტანელმა მოცურავემ - ადამ პიტიმ დიდ ბრიტანეთს პირველი ოქროს მედალი მოუტანა. 21 წლის სპორტსმენმა 100 მეტრიანი გაცურვა 57 წამსა და 13 მეასედში შეძლო და მსოფლიოს ახალი რეკორდი დაამყარა. ოლიმპიურ თამაშებზე 28-წლიანი პაუზის შემდეგ, პიტი ბრიტანეთის პირველი ოქროსმედალოსანი მამაკაცი მოცურავეა. #ცეცხლიაინთო #Rio2016 #Olympics
ლეგენდარულმა ამერიკელმა მოცურავემ - მაიკლ ფელპსმა რიოს ოლიმპიადაზე კარიერაში მე-19 ოლიმპიური ოქრო მოიპოვა. სარეკორდო ოქრო ფელპსმა აშშ-ს მოცურავეთა გუნდის შემადგენლობაში 4X100 მეტრიან დისტანციაზე გაცურვაში მოიგო. #ცეცხლიაინთო #Rio2016 #Olympics
ოლიმპიურ თამაშებზე ქალთა საფეხბურთო ტურნირს სამი გამოკვეთილი ფავორიტი ჰყავს. სამივე მათგანმა სასტარტო მატჩები საკმაოდ იოლად მოიგო. #ცეცხლიაინთო #RIO2016 #OLYMPICS
რიოს ოლიმპიადაზე პირველი მატჩი გამართა ფიჯის საფეხბურთო ნაკრებმა. C ჯგუფის სასტარტო შეხვედრაში გუნდმა სამხრეთ კორეასთან ითამაშა და რვა უპასუხო გოლი გაუშვა. განსაკუთრებით სუსტად ფიჯის მეკარე, სიმიონე ტამანისაუ გამოიყურებოდა. ამავე ჯგუფში მალანეზიური სახელმწიფოს მომდევნო მეტოქეები მექსიკა და გერმანია იქნებიან, მათი ურთიერთშეხვედრა ფრედ 2:2 დასრულდა. #ცეცხლიაინთო #RIO2016 #OLYMPICS