დღეს, საქართველოს რეგიონული განვითარებისა და ინფრასტრუქტურის მინისტრმა, დავით შავლიაშვილმა, მსოფლიო ბანკის რეგიონულმა დირექტორმა სამხრეთ კავკასიაში, ჰენრი კერალმა, საქართველოს საავტომობილო გზების დეპარტამენტის თავმჯდომარემ, ვაჟა ფანჩულიძემ და იმერეთის გუბერნატორის პირველმა მოადგილემ, ალეკო იოსებაშვილმა ქვედა საქარა-საზანოს საავტომობილო გზის 13,4-კილომეტრიანი რეაბილიტირებული მონაკვეთი გახსნეს.
საავტომობილო გზისა და 1 ხიდის რეაბილიტაციას სამშენებლო კომპანია „ბლექ სი გრუპი“ ახორციელებდა. პროექტის საერთო ღირებულებამ 6 მილიონ 532 ათასი ლარი შეადგინა. სარეაბილიტაციო სამუშაოებზე 150-მდე პირი დასაქმდა, მათი 50% ადგილობრივი მოსახლე იყო.

ქვედა საქარა-საზანოს საავტომობილო გზაზე არასდროს ყოფილა ასფალტის საფარი. 10-მდე სოფლის მოსახლე მოხრეშილი გზით სარგებლობდა. პროექტის განხორციელების შედეგად, გაუმჯობესდა რეგიონის საგზაო-სატრანსპორტო ქსელი, რაც, თავის მხრივ, მოსახლეობის სოციალურ-ეკონომიკურ მდგომარეობაზე დადებითად იმოქმედებს და მოძრაობას უფრო უსაფრთხოსა და კომფორტულს გახდის.