■ საყდრისი-ყაჩაღიანის საბადოსთან კაზრეთის მოსახლეობამ, მაღაროზე სამუშაოების გაგრძელების მოთხოვნით აქცია გამართა.

„თავი დაგვანებონ და მუშაობის უფლება მოგვცენ“, - განაცხადეს აქციის მონაწილეებმა, რომელთა უმრავლესობა კომპანია „არ ემ ჯი გოლდშია“ დასაქმებული. სწორედ აღნიშნული კომპანია აწარმოებს სამთო-მოპოვებით სამუშაოებს საბადოზე.

აქციაზე მათ მიტანილი ჰქონდათ პლაკატები, რომლებზეც მათი მოთხოვნები იყო დაფიქსირებული.

როგორც კომპანიის თანამშრომლებმა „ინფო 9“-სთან საუბრისას განაცხადეს, საბადოს კულტურული მემკვიდრეობის ძეგლის სტატუსი არ აქვს.

დაბა კაზრეთის რაიონის მაჟორიტარი დეპუტატის ტარიელ ჯაყელის განცხადებით, „არ ემ ჯი გოლდზე“ ქვემო ქართლის მთელი მოსახლეობაა დამოუკიდებული.

„სამუშაოები უნდა გაგრძელდეს. ჩემი პოზიციაა, რომ კომპანიამ იმუშაოს. მთელი ქვემო ქართლი ამ კომპანიაზეა დამოკიდებული“, - განაცხადა ჯაყელმა.

როგორც ადგილობრივი მოსახლეობა აცხადებს, დღევანდელი აქცია გამაფრთხილებელია. იმ შემთხვევაში, თუ სამუშაობი შეჩერდა და ხალხი ამის გამო უმუშევარი დარჩა, ისინი საპროტესტო ზომებს კვლავ მიმართავენ.

საყდრისის გადარჩენის კომიტეტის წევრები საბადოზე კომპანია „არ ემ ჯი გოლდის“ მიერ სამთო-მოპოვებითი სამუშაოების განახლებას კატეგორიულად ეწინააღმდეგებიან. ისინი ამასთან დაკავშირებით
პერმანენტულ აქციას მართავენ როგორც თბილისში, ასევე საყდრისის საბადოსთან. კომიტეტის წევრების განცხადებით, საყდრისი კულტურული მემკვიდრეობის ძეგლია და მისი განადგურება დაუშვებელია. გავრცელდა ინფორმაცია იმის შესახებ, რომ კომიტეტის აქციებს ბოლნისის მაჟორიტარი დეპუტატი კობა ნაყოფია აფინანსებდა, რაც ერთის მხირვ „საყდრისი მცველებმა“ და მეორეს მხრივ, ნაყოფიამ „ინფო 9“-სთან საუბარში კატეგორიულად უარყვეს.