■ „თავისუფალი თაობა“ „იდენტობის“ ყოფილი ხელმძღვანელისგან საჯარო ბოდიშის მოხდას ითხოვს.
არასამთავრობო ორგანიზაციის წევრები ხვალ რუსთაველის გამზირზე ირაკლი ვაჭარაძის წინააღმდეგ საპროტესტო აქციას გამართავენ. მესამე სექტორის წევრებს შორის დაპირისპირების მიზეზი იდენტობის წარმომადგენლის მიერ სოციალურ ქსელში პატრიარქის საშობაო ეპისტოლის შეფასება გახდა.
ორგანიზაცია იდენტობის წევრის მიმართ მუქარას დღეს რამდენიმე არასამთავრობო ორგანიზაცია სპეციალური განცხადებით გამოეხმაურა.
მესამე სექტორის წარმომადგენლები ხელისუფლებასა და სამართალდამცავ ორგანოებს შესაბამისი ზომების მიღებისკენ მოუწოდებენ. ისინი ითხოვენ, რომ სახელმწიფომ სიტყვისა და გამოხატვის თავისუფლების დაცვა უზრუნველყოს.
ამ ინციდენტზე არ საუბრობენ საპატრიარქოში, სადაც დღის ბოლოს განცხადება იდენტობის ოფისთან დაგეგმილი აქციის გამო გაავრცელეს. მართლადიდებელი ეკლესია ორგანიზატორებს მხარდაჭერისთვის მადლობას უხდის. თუმცა, აქციის ჩატარებისგან თავის შეკავებას ურჩევს.