„თავისუფალი თაობის“ ბათუმის რეგიონული ორგანიზაციის ხელმძღვანელის ვახტანგ მითაიშვილის განცხადებით, პარლამენტის წევრმა მურმან დუმბაძემ მასთან სატელეფონო ზარი განახორციელა მას შემდეგ, რაც ახალგაზრდებმა მის სახლთან მისვლა და აქციის მოწყობა დააანონსეს.
„დუმბაძემ დამირეკა და მითხრა , რომ მასთან ავსულიყავი. ხომ დააანონსეთ, რომ მოდიხართო, ჰოდა თუ მაგარი ბიჭები ხართ, ამოდითო“, -აღნიშნა მითაიშვილმა.
მითაიშვილი დუმბაძის მიერ იარაღის შეძენის ფაქტსაც გამოეხმაურა და მომხდარი სასაცილო ფაქტად შეაფასა, რადგან, მისი თქმით, აღნიშნული აქციით არც დუმბაძეს და არც მის ოჯახს საფრთხე არ ემუქრება.
„თავისუფალი თაობის“ წევრებმა რამდენიმე დღის წინ საპროტესტო აქცია აჭარის უმაღლესის საბჭოს დეპუტატის ჯემალ ფუტკარაძის სახლთან გამართეს, სადაც განაცხადეს, რომ ისინი აქციებს „ქართულ ოცნებას“ ჩამოშორებულ ყველა დეპუტატის სახლთან გეგმავენ. მათი თქმით, ბოლო ვისაც სამარცხვინო საქციელში ამხელენ, მურმან დუმბაძე იქნება.
აღნიშნული ინფორმაციის გავრცელების შემდეგ, საქართველოს პარლამენტის წევრმა მურმან დუმბაძემ იარაღის ყიდვა გადაწყვიტა. დეპუტატის თქმით, რადგან მთავრობა ვერ უზრუნველყოფს მისი და მისი ოჯახის დაცვას, ის თავად შეეცდება, თავი იარაღით დაიცვას.