ცნობილმა საოპერო მომღერალმა, მოსკოვში მცხოვრებმა ქართველმა ზურაბ სოტკილავამ პოპულარულ რუსულ თოქ-შოუში სოხუმში გადაღებული კადრების ნახვისას, სადაც მისი მშობლიური სახლი და მშობლების მოუვლელი საფლავი ჩანდა, ემოცია ვერ დამალა და იტირა.
გადაცემის მსვლელობისას სოხუმიდან ნაჩვენებ კადრებში კარგად ჩანდა, როგორ მორეოდა სარეველა სასაფლაოს. მოპარული იყო სოტკილავას მშობლების საფლავის ქვებიც. სოტკილავას სოხუმელი ნათესავის კომენტარით, რომელიც გადაცემაში გავიდა, ის ამ საფლავებს უვლიდა, თუმცა ქალაქში 1-2 წელი არ ყოფილა და ახლა ასეთი მდგომარეობა დახვდა.
კადრების ნახვის შემდეგ ტელეწამყვანმა ჰკითხა სოტკილავას, ჩადიოდა თუ არა ის მშობლების საფლავზე, რაზეც სოტკილავამ უპასუხა: "არა, მე ომის მერე არ ჩავსულვარ აფხაზეთში, მე მყავს საკმაოდ გავლენიანი აფხაზი მეგობრები, რომელთაც შეუძლიათ ჩემი უსაფრთხო ჩასვლა უზრუნველყონ სოხუმში, მაგრამ იმის გამო, რომ ბევრი ქართველი, რომლებსაც საკუთარი სახლები მიტოვებული აქვთ და ვერ ჩადიან აფხაზეთში, მეც არ ჩავდივარ იქ, არ მინდა მათ ვაწყენინო".