ბოლნისის, დმანისის, თეთრიწყაროს, წალკისა და გარდაბნის მუნიციპალიტეტების ფოლკლორული ანსამბლები და შემოქმედი ადამიანები არტ-გენმა გააერთიანა.
ხალხურმა რეწვამ, ტრადიციულმა სუფრამ, საბრძოლო ხელოვნებამ, ქორეოგრაფიამ და თანამედროვე მუსიკამ ერთ სივრცეში მოიყარა თავი, ასე გაიხსნა ეთნოგრაფიული ფესტივალი „არტ-გენი - 2016“, რომელსაც ბოლნისმა პირველად უმასპინძლა.
ქვემო ქართლის ხელოვანებმა ულამაზესი ხალხური რეწვის, მხატვრობისა და მინანქრის ნამუშევრები გამოფინეს. აქ ასევე წარმოდგენილი იყო ქართული ტრადიციული სუფრის განუყოფელი ნაწილი ღვინო, რომელმაც სტუმართა დიდი დაინტერესება გამოიწვია. თეთრიწყაროს მუნიციპალიტეტი თავს საოჯახო ნაწარმით იწონებდა. ფესტივალის მიზანიც სწორედ ხალხური და ტრადიციული შემოქმედების პოპულარიზაცია, უცნობი და ნაცნობი ნამუშევრების გაცნობაა.
ფესტივალი არტ-გენი 2004 წლიდან საქართველოს სხვადასხვა კუთხეში ყოველწლიურად იმართება. დღეს ის ქვეყანაში ერთ-ერთ ყველაზე ცნობილ და ხალხმრავალ ფესტივალს წარმოადგენს. საკმაოდ მრავალფეროვანი და მასშტაბური სახე ჰქონდა არტ-გენს ბოლნისშიც. კულტურისა და დასვენების პარკში გამართული აქტივობები ყველა ასაკის სტუმარზე იყო გათვლილი. კულტურულ ღონისძიებებში აქტიურად იყვნენ ჩართულები სპორტის წარმომადგენლებიც. აქ თავმოყრილ საზოგადოებას შორის მრავლად იყვნენ საპატიო სტუმრებიც.
„არტ-გენი - 2016“ სლოგანით „დავუბრუნდეთ სოფელს“ ბოლნისში „ფრანისა“ და „რეგიონის“ სოლო კონცერტით დასრულდა. ფესტივალი საქართველოს სხვადასხვა კუთხეში გადაინაცვლებს და 28 ივლისს ტრადიციულად თბილისში ეთნოგრაფიულ მუზეუმში დასრულდება.
#ბოლნისი #არტგენი #რეგგიონი #ფრანი