დღეს საქართველოს თავდაცვის სამინისტროსა და გაეროს ქალთა ორგანიზაციას „UN WOMEN“ შორის ურთიერთგაგების მემორანდუმი გაფორმდა. თანამშრომლობის მემორანდუმს თავდაცვის მინისტრის პირველმა მოადგილემ, ლელა ჩიქოვანმა და საქართველოში გაეროს ქალთა ორგანიზაციის წარმომადგენელმა ერიკა კვაპილოვამ მოაწერეს ხელი.

მემორანდუმი გენდერულ საკითხებში თანამშრომლობის გაღრმავებას გულისხმობს. მხარეები შეთანხმდნენ, გენდერული თანასწორობის ვალდებულებების შესასრულებლად განაგრძონ მუშაობა სამინისტროში ეფექტური ინსტიტუციური მექანიზმების განვითარებისა და გაძლიერებისათვის. მემორანდუმის მიხედვით, თავდაცვის სამინისტრო „ქალები მშვიდობისა და უსაფრთხოებისათვის“ დღის წესრიგის განმახორციელებელი წამყვანი სახელმწიფო უწყება გახლავთ.

გაეროს ქალთა ორგანიზაციისა და თავდაცვის სამინისტროს სამწლიანი თანამშრომლობის ფარგლებში, თავდაცვის უწყებამ გენდერული თანასწორობის განმტკიცებისა და ეროვნული სამოქმედო გეგმის, გაეროს უშიშროების საბჭოს რეზოლუციების განხორციელების პროცესში მნიშვნელოვან პროგრესს მიაღწია. გაეროს ქალთა ორგანიზაციის მხარდაჭერითა და თავდაცვის სამინისტროს „გენდერული თანასწორობის სტრატეგიის“ თანახმად, რეგულარულად ხორციელდებოდა თავდაცვის სამინისტროსა და შეიარაღებული ძალების ქვედანაყოფების გენდერული მრჩევლების ტრეინინგები, სამინისტროს სისტემაში გენდერულ ნიადაგზე გასაჩივრების მექანიზმების გაუმჯობესების ღონისძიებები, სამხედრო განათლებისა და საერთაშორისო სამშვიდობო ოპერაციებში გადასროლისწინა მომზადების პროცესში გენდერის საკითხების სისტემატიზაცია.