საქართველოს თავდაცვის სამინისტროსა და თურქულ კლინიკას შორის მემორანდუმი გაფორმდა
საქართველოს თავდაცვის სამინისტროსა და თურქულ კლინიკა REYAP HOSPITAL ISTANBUL-ს შორის ურთიერთთანამშრომლობის მემორანდუმი გაფორმდა. დოკუმენტს ხელი საქართველოს მხრიდან თავდაცვის მინისტრის მოადგილემ, ზაალ კაპანაძემ, ხოლო თურქეთის მხრიდან საერთაშორისო პაციენტებთან ურთიერთობის მენეჯერმა, ნაზიკე უგურლუმ მოაწერეს.
ურთიერთთანამშრომლობის მემორანდუმის ფარგლებში საქართველოს თავდაცვის უწყების თანამშრომლებს, სამოქალაქო პირებს, სამხედრო მოსამსახურეებსა და მათი ოჯახის წევრებს, საჭიროების შემთხვევაში, თურქეთის კლინიკაში გამგზავრების, შეღავათიან ფასში დიაგნოსტირებისა და მკურნალობის შესაძლებლობა ექნებათ.
ურთიერთთანამშრომლობის მემორანდუმი ქართული მხარისთვის ტრენინგების ჩატარებასა და სამედიცინო პერსონალის კვალიფიკაციის ამაღლებაში დახმარებას, ექიმების გაცვლით ვიზიტებსაც ითვალისწინებს.
დოკუმენტს ხელი გორში, გიორგი აბრამიშვილის სახელობის სამხედრო ჰოსპიტალში მოეწერა. ვიზიტისას თურქეთის დელეგაციამ ჰოსპიტალის ინფრასტრუქტურა დაათვალიერა და სამუშაო გარემოს გაეცნო. მოგვიანებით, მხარეებმა ერთმანეთს კლინიკების ისტორიის, მიზნების, არსებული სერვისების შესახებ პრეზენტაციები წარუდგინეს.