საფინანსო კომპანია „საქართველოს” მიერ დაზარალებული მეანაბრეები კვლავ კუთვნილი თანხის დაბრუნებას მოითხოვენ.
ფინანსურად დაზარალებულები თავიანთი პრობლემის მოგვარების მიზნით, ამჯერად შეხვედრას ეროვნული ბანკის წარმომადგენლებთან მოითხოვდნენ, თუმცა მათი ინფორმაციით, ბანკის მხრიდან გამოხმაურება არ ყოფილა.
როგორც ისინი იტყობინებიან, ეროვნულ ბანკს დღეს ამოეწურა ვადა, რომელიც მას დაზარალებულების მიერ შეთავაზებული წინადადებათა პაკეტის განხილვისთვის უნდა გამოეყენებინა.
დღის მეორე ნახევარში, მათი პროტესტით პრეზიდენტის ადმინისტრაცია დაინტერესდა. პრეზიდენტის ეკონომიკურ მრჩეველთან გამართული შეხვედრის შემდეგ, მეანაბრეებმა განაცხადეს, რომ ადმინისტრაცია მედიატორის როლს შეასრულებს.
მათივე ინფორმაციით, რეზიდენციაში შემდეგი შეხვედრა უახლოეს ათ დღეში გაიმართება.