სახელისუფლებო შტოებს შორის უთანხმოება მწვავდება.
შეთავაზების მიუხედავად, პრეზიდენტის ადმინისტრაცია საკონსტიტუციო ცვლილებებზე მომუშავე კომისიაში ჩართვაზე უარს ამბობს.
გიორგი მარგველაშვილი პარლამენტის თავმჯდომარის ხელმძღვანელობით შექმნილი ფორმატის ლეგიტიმურობას კითხვის ნიშნის ქვეშ აყენებს და ერთპარტიულ გადაწყვეტილებებზე მიანიშნებს. ანალოგიურია ,,ნაციონალური მოძრაობის” წევრთა პოზიციაც.
ავლაბრის სასახლიდან გაკეთებულ მწვავე განცხადებებს არაკორექტულს უწოდებს ირაკლი კობახიძე. ,,ქართული ოცნების” ლიდერები აქცენტს იმ გარემოებაზე აკეთებენ, რომ ქვეყნის უზენაეს კანონში შესატან ცვლილებებზე მუშაობის დროს, მთავარი ფუნქცია პარლამენტს ეკისრება.
შეგახსენებთ, რომ პრეზიდენტი მმართველ პარტიას კომისიის საკუთარ ფორმატს სთავაზობდა და პრემიერთან და პარლამენტის სპიკერთან ერთად თანათავმჯდომარეობას ითხოვდა, თუმცა მმართველმა გუნდმა არჩევანი სამი წლის წინანდელ, ანუ საპარლამენტო ფორმატზე გააკეთა.