სასამართლომ დავით გერლიანი „კანონიერი ქურდობის“ ბრალდების ნაწილში გაამართლა, ხოლო საზღვრის უკანონოდ კვეთის მცდელობაში დამნაშავედ ცნო და ჯარიმა დააკისრა.
გერლიანს, საზღვრის უკანონოდ გადაკვეთის მცდელობის გამო, სასამართლომ 15 000-ლარიანი ჯარიმა დააკისრა. ამასთან, მოსამართლის გადაწყვეტილებით, მხედველობაში იქნა მიღებული ის გარემოება, რომ ბრალდებული სასამართლოს განხილვებისას წინასწარ პატიმრობაში იმყოფებოდა და აქედან გამომდინარე, სასამართლომ მიიღო გადაწყვეტილება, ჯარიმის ოდენობა 6 500 ლარამდე შემცირდეს. დავით გერლიანი სასამართლო დარბაზიდანვე გათავისუფლდა.
პროკურორის თქმით, პროკურატურა მოსამართლის გადაწყვეტილების სამოტივაციო ნაწილის გაცნობის შემდეგ გადაწყვეტს, გაასაჩივროს თუ არა საქალაქო სასამართლოს მიერ მიღებული გადაწყვეტილება.
დაცვის მხარისთვის კი მოსამართლის გადაწყვეტილება მოსალოდნელი აღმოჩნდა, ვინაიდან, როგორც ადვოკატმა თამარ აბესაძემ განაცხადა, ბრალდებულის წინააღმდეგ არც ერთ ეპიზოდში არ არსებობდა მტკიცებულება.