მცხეთის ისტორიულ ძეგლებს გაძლიერებული დაცვის სტატუსი მიენიჭა. გადაწყვეტილება პარიზში, იუნესკოს შტაბ-ბინაში შეიარაღებული კონფლიქტის დროს კულტურულ ფასეულობათა დაცვის კომიტეტის სესიაზე მიიღეს.
კომიტეტის წევრებმა მიიჩნიეს, რომ საქართველოს მიერ წარდგენილი ძეგლი აკმაყოფილებს სტატუსის მინიჭებისთვის აუცილებელ სამივე პირობას:
ძეგლი წარმოადგენს უდიდეს მნიშვნელობას კაცობრიობისთვის, დაცულია შესაბამისი ეროვნული კანონმდებლობითა და ადმინისტრაციული ზომებით, რაც აღიარებს მის ისტორიულ მნიშვნელობას და უზრუნველყოფს ძეგლის განსაკუთრებულ დაცულობას; ძეგლი არ გამოიყენება სამხედრო მიზნებისთვის ან სამხედრო ობიექტების ფარად.
გაძლიერებული დაცვის ქვეშ არსებულ ძეგლს იცავს იმუნიტეტი, რომლის ხელყოფაც, შეიარაღებული კონფლიქტის დროს კულტურულ ფასეულობათა დაცვის ჰააგის კონვენციის თანახმად, სისხლის სამართლის პასუხისმგებლობას ითვალისწინებს.
გაძლიერებული დაცვის სტატუსი მსოფლიოში მხოლოდ 10 ობიექტს აქვს.