#რუსთავი2 #Rustavi2 #ახალიამბები - როგორი იქნება ახალი წლიდან ელექტროენერგიის სამომხმარებლო ტარიფი. უკვე ცნობილია, რომ თელასსა და ენერგო-პროს შესასყიდი ელექტროენერგია 3 თეთრით გაუძვირდათ, თუმცა ენერგეტიკის მინისტრის განცხადებით, ქვითრებზე ეს ცვლილება არ აისახება.

”სხვა ჰიდროელექტრო სადგურების განხილვა უნდა მოხდეს მომავალ კვირაში, ასევე თბოელექტროსადგურების წარმოების ტარიფის ზრდა, გარანტირებული რეზერვის საფასურის და გადაცემის და დისპეჩერიზაციის ტარიფის. დასკვნითი ნაწილი იქნება განაწილების ლიცენზიებისთვის განაწილების ტარიფის დადგენა და სამომხმარებლო ტარიფის დადგენა საბოლოოდ. ასე, რომ ერთიანობაში უნდა მოხდეს ამის გაანალიზება,“ - განაცხადა თელასის საზოგადოებასთან ურთიერთობის სამსახურის უფროსმა ვალერი ფანცულაიამ.

სემეკის ტარიფებისა და ეკონომიკური ანალიზის დეპარტამენტის დირექტორის გივი სანიკიძის თქმით, უნდა მოხდეს ამ ხარჯების გადახედვა და თუ ეს ხარჯები აკმაყოფილებს იმ შემოსავალს, რაც საჭიროა ელექტროენერგიის საყიდლად, ამ შემთხვევაში დარჩება და თუ ხდება ისე, რომ რაღაც ნაწილში ვერ თავსდება ეს ხარჯები, შემდეგ მოხდება მიმართვა სემეკისთვის და დაითვლება რამდენი უნდა იყოს ტარიფი.

ნაციონალური მოძრაობის წევრის რომან გოცირიძის თქმით, ხელისუფლებას ჰგონია, რომ პოლიტიკური შეფასებებით ან მარეგულირებლის დაშინებით რაღაცას მიაღწევენ.

“არ არსებობს ფასების შეკავების მექანიზმი თუ არა სახელმწიფოს უხეში ჩარევა და ბიუჯეტის ხარჯვა ანუ სუბსიდირება. ბიუჯეტს ფული არ აქვს და თუ სუბსიდირებას ვერ აკეთებ და ტარიფები არ იზრდება ეს ნიშნავს რომ დარგი ინგრევა. არ იციან, ჰგონიათ პოლიტიკური შეფასებებით ან მარეგულირებლის დაშინებით რაღაცას მიაღწევენ. თუ ხელი არ გაანძრიეს თავისით არაფერი არ სწორდება “ - განაცხადა რომან გოცირიძემ.

ავტორი: თეონა ცხომელიძე.