შუახევის რაიონის სოფელ დაბაძველში ჭალაში წასულ ორ ქალსა და 6 წლის ბავშვს თავს ჯერ ბელები დაესხნენ, შემდეგ კი მათი დედა. ხანმოკლე ორთაბრძოლის შემდეგ, ცხოველი ბელებთან ერთად ტყეში წავიდა, ზოიძეების ოჯახი კი - ექიმთან. დათვის დატორილ ბავშვს მედიკოსებმა 12 ნაკერი დაადეს, ქალები კი, რომლებსაც დათვებთან ბრძოლა მოუწიათ, სხვადასხვა სახის დაზიანება აღენიშნებათ.

დათვების გამოჩენა უცხო არ არის შუახევის მაცხოვრებლებისთვის, თუმცა, ამბობენ, რომ გარეული ცხოველის ადამიანზე თავდასხმის ფაქტი პირველად მოხდა. ადგილობრივები იმასაც იხსენებენ, რომ დათვები სოფელში, უფრო ხშირად, მოსავლის აღების პერიოდში ჩამოდიან. მოქალაქეების განმარტებით, ვინაიდან მურა დათვი წითელ ნუსხაშია და მისი მოკვლა 50 ათას ლარიანი ჯარიმით ისჯება, მათ საკუთარ ყანებსა და ტყეში გადაადგილება, ხშირად, პიროტექნიკით უწევთ, ცხოველების დასაფრთხობად.

მურა დათვი საქართველოს წითელ ნუსხაშია შეტანილი და შესაბამისად, მისი დატყვევება და ლიკვიდაცია კანონით ისჯება.

#რუსთავი2 #Rustavi2 #ახალიამბები