რამდენიმედღიანი ძებნის და სპეცოპერაციების შემდეგ ბერლინში ტერაქტში ეჭვმიტანილი ლიკვიდირებულია.

ტუნისელი ანის ამრი ღამის 3 საათზე იტალიაში, ქალაქ მილანში პოლიციასთან ორმხრივი სროლის დროს მოკლეს.

გავრცელებული ინფორმაციით, ეჭვმიტანილი მილანის ერთ-ერთ უბანში პოლიციამ საბუთების შემოწმების მიზნით გააჩერა. თუმცა მას შემდეგ, რაც პოლიციამ მას საბუთების წარდგენა მოსთხოვა, ამრიმ იარაღი ამოიღო და სამართალდამცველს ესროლა შეძახილით - „ალაჰ აქბარ“.

პოლიციელებმა საპასუხო ცეცხლი გახსნეს, რის შედეგადაც ეჭვმიტანილი ადგილზე გარდაიცვალა. მოკლულის ჯიბეში აღმოჩენილია მატარებლის ბილეთიც, საიდანაც ირკვევა, რომ ის იტალიაში საფრანგეთის გავლით ჩავიდა.

ტერორისტული თავდასხმა ბერლინის ცენტრში მდებარე ეკლესიასთან, საშობაო ბაზრობის ტერიტორიაზე 19 დეკემბერს მოხდა. დაიღუპა 12 და დაშავდა რამდენიმე ათეული ადამიანი.