შავ ზღვაში ჩამოვარდნილი თვითმფრინავის „ტუ-154-ის" ათი მგზავრის ცხედარი მოსკოვში გადაასვენეს.

სულ სამძებრო ოპერაციების განმავლობაში წყლიდან ამ ეტაპზე 11 ცხედარი ამოიყვანეს. სპეცრეისით ექსპერტიზაზე გადაიტანეს ასევე თვითმფრინავის ფრაგმენტებიც.

სამძებრო ოპერაციების არეალი კი აფხაზეთისკენ ფართოვდება. ოპერაციებში ჩართულია 39 ხომალდი და 3 500 ადამიანი. ასევე, 135 სპეციალისტი და შვიდი სპეცტექნიკა.

„ტუ-154" კვირას გამთენიისას სოჭის სანაპიროსთან შავ ზღვაში ჩავარდა. ადლერის აეროპორტიდან აფრენის შემდეგ ორ წუთში ჩამოვარდა. თავდაცვის უწყებაში განმარტავენ, რომ თვითმფრინავი ტექნიკურად გამართული იყო. მას უკანასკნელად შემოწმება 2016 წლის სექტემბერში ჩაუტარდა. მფრინავი კი, რომელიც საჰაერო ხომალდს მართავდა გამოცდილი, მაღალი კლასის პილოტი იყო.

თვითმფრინავის ბორტზე სულ 92 ადამიანი იმყოფებოდა. მათ შორის ეკიპაჟის რვა წევრი, ცხრა ჟურნალისტი და ალექსანდროვის ანსამბლის 64 წევრი.

დაღუპულთა ხსოვნის პატივსაცემად, ანსამბლის სტუდიასთან მოქალაქეებს ყვავილები მიაქვთ. პატივს მიაგებენ გარდაცვლილ ჟურნალისტებსაც ოსტანტკინოსთან.

ქვეყანაში დღეს გლოვაა გამოცხადებული.