რუსმა მყვინთავებმა შავ ზღვაში ჩამოვარდნილი „ტუ-154-ის" კორპუსი აღმოაჩინეს.

სამძებრო ოპერაცია კატრასტროფის ადგილზე უწყვეტ რეჟიმში მიმდინარეობს. მასში ჩართულია 39 ხომალდი და კატარღა, სპეცტექნიკა და 3500-მდე ადამიანი.

ფედერალური უსაფრთხოების სამსახური კი ამ ეტაპზე ბორტზე ტერაქტის ფაქტს გამორიცხავს. უწყებაში განმარტავენ, რომ თვითმფრინავში არც სამხედრო ან პიროტექნიკული საშუალებები ყოფილა.

ვარაუდობენ, რომ ავიაკატასტროფა, შესაძლოა, ძრავში უცხო საგნის მოხვედრამ, მისმა გათიშვამ ან დაბალი ხარისხის საწვავმა გამოიწვია. არ გამორიცხავენ ადამიანურ ფაქტორსაც.

ცოტა ხნის წინ გავრცელდა ვიდეოკადრები, სადაც სოჭის ცაში კატასტროფის სავარაუდო ადგილას ნათება მოჩანს, თუმცა უსაფრთხოების სამსახურმა მასალის შესწავლისას დაადგინა, რომ ნათება დროში არ ემთხვევა კატასტროფის მომენტს.

ქვეყანა კი დაღუპულებს გლოვობს. ზღვის ფსკერზე ნაპოვნი ათი ცხედარი სპეცრეისით უკვე მოსკოვში გადაიტანეს. ახლა მათ ექსპერტიზა ჩაუტარდებათ.

ავიაკატასროფა სოჭში 25 დეკემბერს გამთენიისას მოხდა. ადლერის აეროპორტიდან აფრენის შემდეგ თვითმფრინავი ზღვაში ჩავარდა.

დაღუპულია ბორტზე მყოფი 92-ვე ადამიანი.