დიდი ოდენობით ქონების თაღლითურად დაუფლების ფაქტზე, სამართალდამცველებმა დანაშაულებრივი ჯგუფის ოთხი წევრი დააკავეს. მათ შორის ორი ადვოკატია.
პროკურატურის ინფორმაციით, დაკავებულები ფაქტების დამახინჯებითა და მოტყუებით, 2015 წლის 13 ივნისის სტიქიის შედეგად დაზარალებულ ზონაში არსებულ მიწის ნაკვეთსა და მათზე განთავსებულ შენობა-ნაგებობებს დაეუფლნენ.
თაღლითური სქემის შესახებ დაზარალებულების უფლებადამცველებმა დღეს გამართულ ბრიფინგზე ისაუბრეს. მათი თქმით, სტიქიის ზონაში მოხვედრილ ტერიტორიაზე არსებული მიწის ნაკვეთის გასაფორმებლად, ოჯახებმა რამდენიმე წლის წინ ადვოკატებს მიმართეს, რომლებმაც ქონება სხვა პირებზე გააფორმეს.
დანაშაულს უარყოფენ დაკავებულთა ადვოკატები და აცხადებენ, რომ პროკურატურის ბრალდებები უსაფუძვლოა.