თბილისის მერიასთან აუტიზმის სპექტრის დარღვევების მქონე ბავშვების მშობლების აქცია მიმდინარეობს. აქციის მონაწილეები თბილისის მერიის იმ გადაწყვეტილებას აპროტესტებენ, რომლის მიხედვითაც, მათ შვილებს თერაპიისთვის განკუთვნილი თვეში 20 საათის დაფინანსება 15 საათამდე შეუმცირდებათ.

მშობლების თქმით, ამის შესახებ ინფორმირებულები არ ყოფილნა და ეს გადაწყვეტილება მათ შვილებს მძიმე პირობებს უქმნის.

აქციის მონაწილეები დედაქალაქის მთავრობის წარმომადგენლებთან ითხოვენ შეხვედრას. აღნიშნულ საკითხს უწყებაში ჯერ არ გამოხმაურებიან.

„აუტიზმის სპექტრის დარღვევის მქონე ბავშვთა რეაბილიტაციის“ ქვეპროგრამის განხორციელების წესში ცვლილებები შედის. ცვლილებების პროექტი განსახილველად უახლოეს დღეებში დედაქალაქის საკრებულოს გადაეგზავნება.

„ჯანდაცვისა და სოციალური მომსახურების საქალაქო სამსახურის მიერ წარდგენილი ცვლილებების შესაბამისად, ქვეპროგრამით სარგებლობის უფლება ექნებათ დაავადებათა საერთაშორისო კლასიფიკატორის (ICD-10) განვითარების ზოგადი აშლილობების (F84.0; F84.9) ჯგუფის დიაგნოზის მქონე 2-დან 15 წლის ასაკის ჩათვლით საქართველოს მოქალაქეებს. ქვეპროგრამაში ჩართვის მსურველები, თბილისის მერიისთვის განცხადებით მიმართვამდე, ბოლო 1 წლის განმავლობაში და ამავდროულად, ქვეპროგრამაში ჩართვის დროისთვის თბილისის მუნიციპალიტეტში უნდა იყვნენ რეგისტრირებულნი, მათ შორის არიან ის პირები, რომლებსაც თბილისში 1 წლიან რეგისტრაციაში მისამართის შეცვლის გამო უფიქსირდებათ წყვეტა; პირები, რომლებიც 2015 წლის 1 ივლისის შემდეგ დაიბადნენ და რომლებსაც ქვეპროგრამაში ჩართვის დროისთვის 2 წელი შეუსრულდათ; იძულებით გადაადგილებული პირის სტატუსის მქონე პირები, რომლებიც დევნილის სტატუსის დამადასტურებელი დოკუმენტის მიხედვით თბილისის მუნიციპალიტეტში არიან რეგისტრირებულნი. რაც შეეხება ქვეპროგრამის ფარგლებში დაფინანსების წესს, ქვეპროგრამის ფარგლებში 7 წლამდე ასაკის მოსარგებლისთვის დაფინანსდება კომპლექსური თერაპიის 20 (მინიმუმ ერთსაათიანი) სეანსი, ხოლო 7 წლის და ზემოთ ასაკის მოსარგებლისთვის – 15 სეანსი. 7 წლამდე ასაკის მოსარგებლისათვის ვაუჩერის ღირებულება შეადგენს 420 ლარს, ხოლო 7 წლის და ზემოთ ასაკის მოსარგებლისათვის – 315 ლარს“,- ნათქვამია მერიის განცხადებაში.