ახალ სახლში შეხვდება ახალ წელს ზუგდიდის მუნიციპალიტეტში 6 ოჯახი. მძიმე სოციალური პირობების მქონე ოჯახებს სამეგრელო-ზემო სვანეთის გუბერნატორმა და ზუგდიდის გამგებელმა საჩუქრად სახლები გადასცეს.
ლევან შონიამ სოფელ ჭაქვინჯში კობა გულორდავას 8 სულიან ოჯახს ოთხოთახიანი კეთილმოწყობილი სახლი გადასცა. გულორდავები აქამდე ავარიულ სახლში 6 მცირეწლოვან შვილთან ერთად ცხოვრობდნენ.
ახალ მოსახლეთა შორის სოციალურად დაუცველი მრავალშვილიანები, შეზღუდული შესაძლებლობების მქონე პირები, მარტოხელა დედები, მარჩენალდაკარგულები და ხანდაზმულები არიან.
წელს ზუგდიდის მუნიციპალიტეტის გამგეობამ მძიმე საყოფაცხოვრებო პირობების მქონე 25 ოჯახს საცხოვრებელი სახლი აუშენა. 19 ოჯახს სახლები ოქტომბერსა და ნოემბერის თვეებში გადასცეს, პროექტის ჯამური ღირებულება 600 000 ლარია. პროექტი 2017 წელსაც გაგრძელდება.